African Storybook - Ɨmmwa'tɨ ɨ̀n ntàl

Ɨmmwa'tɨ ɨ̀n ntàl

Yoh Edelquin Nabi

Andrews Opoku Antwi and Michelangelo Quaye Anang

Kwesi Gyasi nɨn læ nà chi ŋêyn bò ŋweyn nɨ̀ nà ŋweyn a ntè', ghɨ toŋtɨ̀ na Asembaye. Wù læ na kelɨ suyn ŋweyn ɨ̀ juŋ ɨ̀li ghɨ toŋtɨ̀ na Kweku Twum. Àŋena læ nà chi a nte' imò', fi ndù kɨ a ndô ŋwà'lɨ̀ imò'.

Bò Kwesi ŋêyn nà ŋweyn læ nà ghɨ Bàba ŋeyn Nàwàyn. Nàwàyn læ nà lum tebtɨ wayn ŋweyn kɨ mɨlvɨ ɨ̀n jɨ̀m na, "Ka wù læ se' sàm a jvâ, kesa jva zɨ̀ a jvasɨ̀ jɨ̀msɨ̀ nɨ zɨ ateyn bòm ta yì n-be'ma."

A nà sɨ ghɨ ta ɨ fvɨ̀ sɨ yvɨ̀tɨ̀ sɨ-a ndô ŋwà'lɨ̀, Kweku Twum ɨ ndù ijêl a Simba (a Winneba).

Wù n- læ ndù sɨ chwôsɨ̀ ilvi ɨ yvɨtɨnɨ nâ wêyn nêyn lùmsɨ nà ŋweyn, ɨ Kobina Amfo, wu kelɨ ngù'sɨ̀ si dvɨ̀ a Simba.

A n-lae nà ghɨ ta Kweku Twum kasi gvì sɨ-a Simba, wu ndùsɨ mùtɨ suyn neyn Kwesi Gyasi. Wu fè'tɨ àwo sɨ Kwesi kum àwo kì a wù ti yeyn, nɨ̀ àdeŋà, a to' yi kɨ nô ì sam i jvâ zɨ̀ a jvasɨ̀ jɨ̀msɨ̀ nɨ zɨ ateyn!

Kwesi yvɨtɨ nà sɨ kòŋ à fi dzɨ̀ na ndà fu ma wù ti ndù ŋweyn Kweku a jvâ yè a jvasɨ̀ jɨ̀msɨ̀ nɨ zɨ ateyn.

Nɨ̀ nchùe ɨ kfeyn achi alya, suyn sèynsɨ̀ bò ɨ ba'tɨ̀ sɨ̀ se' isàm a jvâ a àŋena nte'. Àŋena ɨ lù, nô wùl ɨ̀ ki wi àŋena.

Kɨ teyn ta àŋena zɨ a jvâ, Kweku Twum ɨ chà' a jvâ ɨ sàs ɨ̀ mu. Wu jàŋ Kwesi na wù boŋ chà' ba'sɨ sɨ nweyn mɨ̀ti wu tuynsɨ. Wu kfà'tɨ̀ itebtɨ i nà ŋweyn.

Mɨ̀tì Kweku bu'sɨ kɨ atu a sûyn ŋweyn tèyn, wu zɨ kòli ŋweyn. Àŋena nà sɨ ndèŋsɨ̀ dɨm kɨ nô dɨm a jvâ.

Ɨtu' nà sɨ yɨ-a, ichue zue ɨ sœ. Kweku ɨ bè sɨ Kwesi na àŋena ba'tɨ sɨ nà kfâ sɨ-a ndo. Wu fvɨ̀ sɨ-a jvâ, ɨ yumsɨ ɨwuyn ŋweyn, mà' ndzɨsɨ ŋweynsɨ. Kwesi bu du' kɨ ateynɨ̀ jvà.

Sɨ ibàm ateyn, Kwesi ɨ boŋ kfà'tɨ̀ sɨ fvɨ sɨ-a jvâ. Mɨ̀tì wu yvɨ ta àfo nɨn guf ifyeyni ŋweyni, wu yvɨ iyaf nô sɨ-a ŋaŋ. "À n-kɨŋ sɨ gyàyn gha?" wu byal dzɨ̀.

Wu bèynsɨ̀, ɨ ki zɨsɨ a jvâ ɨ fi byal. Wu yeyn ànfèynfèyn, màti fɨ̀yɨ̀ni fɨ jvâ, ɨ fi zɨ̀tɨ̀ nà sɨ byal na ghɨ gàmtɨ ŋweyn.

Kweku Twum ɨ yvɨ ta sûyn ŋweyn nɨn byal. Wu ndu sɨ gamtɨ Kwesi.

Kweku gùf fvɨ̀sɨ̀ sûyn ŋweyn a le' a yuminɨ-a ɨ nyɨŋ ndù a ntè' sɨ̀ keli i gamtɨ̀.

Ghelɨ̀ ntè' ɨ yvɨtɨ ta Kweku byal ɨ̀ nyɨŋ ndù a dzɨ jva. Àŋena yeyn Kwesi Gyasi wu nyɨŋ-a bu taŋi wì, nɨ̀ mɨ̀lùŋ a nse. Àŋena bè'i wayn na vzɨ̀ ndù nɨ̀ ŋweyn a ndô afi.

Ɨtu' ɨ̀ layn Kwesi ɨ̀ yema ikuyn a ndô afɨ̀ ŋeyn bò ŋweyn nɨ̀ nà ŋweyn, ba'sɨ̀ nɨ̀ Kweku Twum wu ti a ŋweyna ngùŋ. Wu yvɨ ta ifyeyn i ŋweyni nɨ̀ nkœ̀ nɨ ŋweyn nɨn yaf nô sɨ-a ŋaŋ.

Ghɨ bè sɨ ŋweyn na ifyeyni nɨ̀ nkœ̀ nɨ ŋweyn nɨ ghɨ ma ghɨ teyn meyn. Kwesi zɨ̀tɨ̀ sɨ dzɨ̀, i loyn ilesɨ fu sɨ̀ na ŋweyn. Wu bèynsɨ̀ a mbòlɨ̀ gya na, "Ghɨ lum bê na nda kya nda lum gvì kesa ibam. A na ghɨ̀ na wa na yvɨnɨ sɨ ma."

You are free to download, copy, translate or adapt this story and use the illustrations as long as you attribute in the following way:

Ɨmmwa'tɨ ɨ̀n ntàl

Author - Addison Gifty Naana, Aihoon Fatima, Biney Kwesi, Oduro Gifty and Sam Gabriel Ampa
Translation - Yoh Edelquin Nabi
Illustration - Andrews Opoku Antwi and Michelangelo Quaye Anang
Language - Kom
Level - Read aloud