Enkolong E Jumamosi Nairowua
Leonard Kotikash
Wiehan de Jager
Ore enkolong nabo olapa le tomon aare, neirowuaju oleng. Negogong'u pooki ng'ae. Nejoki ng'otonye Sialo, Tito o Keko, "Mayieu nadol intae te embat e nanu."
Neipang teaji. Nejoki Keko inkulie, "Emaape olkeju." Newaliki Sialo ajoki, "Keirobi ine." Kake etiaka Tito, "Mme pee kipuo aaisompira. Toloip ake kinguran, te mbata enkare."
Eton ake eirowua te nkiguran e Libeke te entonata o' olchani. Niking'as aaitayu inamuka, kake eton ake eirowua. Nikintoki aaitayu inkilani, kake eton ake eirowua.
Nikintadoiki inkejek atua enkare pee eiropiju. Nikintoki aisuakino enkare neitashala iyiook enkare.
Nejo Keko, "Ootu emataar enkare, amu meyiolou aikata yeiyio." Nikiaar enkare, nikisompira, neitu kintoki aaduaaya enkolong.
Ore pee edoyio enkolong, nikinteru aaning enkijape. Nikipuku te nkare aaing'oru inkilani. Koree duoo inkilani ang?
Nikitalu te abori ilkeek. Nikitalu te entim. Nikitalu te pooki wueji.
Ore te embata o' olkeju, netii inkishu naagira aadaa aanya inkujit. Neshumunye Sialo, Tito o' Keko aaing'or inkishu. Neduaya entoki nado nanyaita enkiteng. Nejo Sialo, "Einosita enkiteng entapukai nado." Newaliki Keko ajoki, "Mme entapukai, enkila ino."
Nekidol ae kiteng nanyaita entoki pus. Nebuaku Tito ajo, "Enkila ae idia!"
Nekishuko ang mikiaata inkilani, kinkirikira te nkijape. Nekinchir aajo, "Inkishu naainosa inkilani ang." Kake ijo ketonyorrayie yieyio? Ore ina kata ake, neirowuaju iyiook iltuli, neme te enkaraki enkolong.
You are free to download, copy, translate or adapt this story and use the illustrations as long as you attribute in the following way:
Enkolong E Jumamosi Nairowua
Author - Nombulelo Thabane and Tessa Welch
Translation - Leonard Kotikash
Illustration - Wiehan de Jager
Language - Maa
Level - First paragraphs
© African Storybook Initiative, 2014
Creative Commons: Attribution 4.0
Source www.africanstorybook.org
