Lutweela kumuumu kwaaburukha naabi
Cornelius Wekunya
Wiehan de Jager
Lumasaaba
Lyaba lihangilwe lye lwa khasesaba lutweela, mu mweesi kwa Namayiiya, kumuumu kwe baandula naabi. Buli muundu wewulila buubi.

Maayi waakhulakila ari, "Soome, ni Namoome, ni Moshe, ni murure ibulafu, mutsye mwinyahe. Singana mwantsikhala mu bikyele byase ta."
Khwaarura ibulafu. Namoome waaloma ari, "Khutsye khu luutsi. Niyo ili ikhunyifu khufuura ano."

Soome welamo ari, "Maayi aakhuboolela khuulekha khuusuba mu luutsi ta."

Namoome weelamo ari, "Siikane khusube ta,
kane khwinyayile busa mu shisiisa shishiili aambi ni kameetsi."
Ne khukhwiinyaha kasaango kuli kumulimo kukuukyesemulisa naabi, akhaba nga muli mu shisiisa, aambi ni luluutsi. Khwanyoowa khweyabulamo tsingaato tseefwe.

Ne khweloosela khukhwiwulila isuuya. Lwanyuma khwarusamo tsisaati ni maliinda. Ne khwaarama nga khushikyesemulila busa.
Khwara bikyele byeefwe mu meetsi khuubinyisa.

Nio khwehanyakila kameetsi.

Khaangukho khwanyakaanyaka kameetsi.
Mooshe waaloma ari, "Aso basiya! Lekha khusube! Maayi s'akane amanye ta."

Khuryo khwaasuba, khwaasuba, khwaasuba, khwebilila n'inyaanga.
Inyaanga yaananikha khuulaambisa, khwaananikha khuunikina imbewo.

Ne tsingubo tseefwe yaba tsili waheena?
Khwaatsya khwaatsiheentsa mu bisaala.

Khwaatsiheentsa mu bisiinyo.

Khwaatsiheentsa buli aandu.
Ne yabawo tsikhaafu tsitsaba tsaaya bunyaasi bubun'gaaha. Soome wenyusa tsimoni, waaloma ari, "Bona ikhaafu iyo? Ili na shiina mu khanwa mwayo?"

Namoome weelamo ari, "Ili khuunyaanya shimuli shibesemu."
Mooshe weelamo ari, "Sishili shimuli shibesemu ta. Iyo isaati yoowo."

Khwaabona ikhaafu ikiindi, nga ili khuunyaanya shishiindu shishiindi sha bululu. Namoome waayokesa ari, "Uyo maliinda wase!"
Khwaloota ingo, nga khuli mu ndoobe tseefwe, khunikina busa. Ne shiiri bari khulwe luunyire shonyene ta. Khwalila, "Tsikhaafu tsitsalya tsingubo tseefwe."

Ne Maayi s'aashifukiilisa ta. Khaangu kamatakho keefwe kaabila naabi pilo, ne akhuba lwe bukhafu bubwaama khu nyaanga ta.
You are free to download, copy, translate or adapt this story and use the illustrations as long as you attribute in the following way:
Lutweela kumuumu kwaaburukha naabi
Author - Nombulelo Thabane and Tessa Welch
Translation - Cornelius Wekunya
Illustration - Wiehan de Jager
Language - Lumasaaba
Level - Longer paragraphs
© African Storybook Initiative, 2014
Creative Commons: Attribution 4.0
Source www.africanstorybook.org