Ehy'egulo Hu Lw'omukaaga Olwaliho Ebbugumu
Gershom Hirome
Wiehan de Jager
Lwali lwamukaaga ahamwi homu Namboŋa ni hememula. Ebbugumu lyali ebitirifu era hiisi muutu gaali hiiyohe. Nga maama atuloma ati, "Bbooti, Mafuta ni Luhoodi mutuseho ehiiyohe, mutule ebulafu muje mugudule!"
Nga huduluma hutula ebulafu. Nga Luhoodi aloma ati, "Hutiine hu lwabi, eyo pololohiho." Nga Bbooti aloma ati, "Maama gatugeene ohwebbomba mu lwabi." Nga Luhoodi agaluhamo ati, "Sihunebbombe wabula hunagudulire mu hiŋolu ohuupi n'olwabi."
Aye omugudulo gw'ohwepena gwali gutuyaania wayire nga gwali ŋaasi wa musaala ohuupi n'olwabi. Ohwenda hutaŋulira bbugumu hweheerera hwefiihulamo engaito. Coka era hwasigala ni huŋulira ebbugumu. Ng'aŋo hwefiihulamo esaati n'ebirinda. Era hwasigaliriye ni huhiiriho ebbugumu.
Ehyahanda nga huta amagulu geefe mu lwabi gahaŋolaho. Ehyo ni hitahena nga hweswanyusaho amaaji hudoola.
Nga Mafuta ahanda aloma ati, "Muhole seeyi hwebbombe! Ko muŋeega muuti maama anamanye?" Ng'aŋo hwebbomba, hwebbomba hwibirira n'esaawa ej'ohwagama.
Eryuba ni lyatandiiha ohwihirira ohuja ohugwa mu maaji ng'embeŋo etandiiha ohutuŋamba. Era nga ko huhebulira ohwendula aŋahutaaye engoye jeefe.
Hwajendula ŋaasi w'emisaala, hwendula mwisugu, hwendula hiisi ŋaatu, coka ndihujibona.
Ŋaaliŋo eŋombe ohuupi n'olwabi ni yaaya enyaasi egimuhi hwigobo. Bbooti ni gagangamuha ng'ayibona atuloma ati, "Mubone eŋombe yira! Yirya hina?" Nga Luhoodi aloma ati, "Yiri hulya ehimuli ehirando." Nga Mafuta aloma ati, "Oli hisiru? Sobona oti yiri hulya saati yiyo?"
Nga hubona eŋombe eyindi niyo ni yiri hulya ehiitu ehya bbululu. Nga Bbooti genianguha ati, "Yiri hulya hirinda hyange."
Hwagamayo engo mu pajama jeefe ni hukakana. Sirwa mbeŋo aye olwohuba hwali humanyire ehinatwoleho. Olwohuleha eŋombe jalya engoye jeefe obunyuma bwali butubaliriiye ni humanyire huuti maama anatusyalemo obuswanyuswanyu.
You are free to download, copy, translate or adapt this story and use the illustrations as long as you attribute in the following way:
Ehy'egulo Hu Lw'omukaaga Olwaliho Ebbugumu
Author - Nombulelo Thabane and Tessa Welch
Translation - Gershom Hirome
Illustration - Wiehan de Jager
Language - Lunyole
Level - First paragraphs
© African Storybook Initiative, 2014 2014
Creative Commons: Attribution 4.0
Source www.africanstorybook.org
