Enguge Ejerwenga Eno Ni Neera
Bukheye Mulongo Christopher
Benjamin Mitchley
Abaatu abamenyanga mu buyumba obudidiri mu hitahere hyawe emirembe jabaŋwaho olw'esolo ejomwisugu ejatagiha ohutiinanga ni jibatihirisa.
Esolo ejo jalyanga ebirime byawe era ni jinuula n'abaana. Ehifo ehyo sihyali hiraŋi hyahumenyamo, coka abaatu abo ni bahaya eyi banaaje.
Hirala hu bidaala nga hifuna ehyohuhola. Nga hisenguhira mu sozi. Sihyali higumu ohufuna ebiryo mu sozi.
Esugu lyameranga mufwa jamabaale. Emisaala jameranga mu materemuho g'esozi. Abasaaye bateganga enduyu jomu mabaale ate abaana baŋimanga enyuni.
Amago agandi goosi nga gafania engeri eyi amago ago agaali ni gamenyire mu sozi olu gaali bulaŋi. Nga mulala hu basinde aloma abahye ati, "Obulamu bulaŋi eyo bwomu sozi bulaŋi. Hola wujeyo wesi."
Mu hamanga hatono amago agandi goosi gasenguha mu hirafu nga gatiina mu sozi. Hiisi maago gafuna epungulu omwohumenya era omwo baŋulira obubalire n'emiyaaya.
Amangu abaana bafuuha bangu mu huniina agabaale n'ohufuna ebiryo hu misaala. Basobolanga ohweŋuuba musaga j'emisaala oti hani kima.
Pola pola ebiitu byatagiiha ohucuuha. Abaana balomanga hatono ate basama hibbala. Abaatu abaŋangafu bafania baati esuulu jaawe jaali jiri hugeeja era ti baali bali humeraho efiiri nyingi.
Hiisi ludalo olu bahejanangaho babonanga baati ameeno gaawe gaali maleŋi. Era batagiiha ohugendera humagulu ane.
Bafuuha ebisolo ebinyaha ebyali ni bitabonehangaho mu hifo ehyo. Jino nj'esolo eji baatu balanga baati enguge.
Mu hamanga hatotono, enguge jali mu sangaalo. Jalehera ohubesa enduyu j'omusoozi nga jilya amasa g'omwiroba.
Bebirira engeri ey'ohulomamo. Befihulamo engoye olwohuba ti amagulu n'emihono jaaliho amooya amamali.
Gaali gahihebulira gaati gaali baatu. Gahejanangaho hu gasuulu nga gejeha.
Aye sigasiima ohujehana. Gatumatuma olwobusungu. Mangu enguge jaali sijisobola huba ŋalala olwohujehanangaho n'obusungu. Hiisi lugo Iwa tinanga lumenya hu lwaŋo.
Ceeva enguge jimenya mu bubinja butono hatyane era sijimenya mu bibinja ebibbala nga engwanga ely'enguge.
You are free to download, copy, translate or adapt this story and use the illustrations as long as you attribute in the following way:
Enguge Ejerwenga Eno Ni Neera
Author - Southern African Folktale
Translation - Bukheye Mulongo Christopher
Illustration - Benjamin Mitchley
Language - Lunyole
Level - First paragraphs
© African Storybook Initiative 2014
Creative Commons: Attribution 4.0
Source www.africanstorybook.org
