Mbwali ni Nsooli
Kyambogo University and Paul Wambi
Alice Toich, Catherine Groenewald, Melany Pietersen, Venolin Keanan Govender and Wiehan de Jager
Yaliyo omusaadha eyali n'abakazi be babiri. Abakazi bano baazaala abaana baibwe ab'obughala babiri, Mbwali ni Nsooli. Muganda ghaibwe ku bbaabba yali nga abenda inho boonaboona.
Mbwali yali mukozi wa mirimo inho, muyondho ate wa mpisa nnhungi.
Nsooli ye ku luuyi olundi, yali mugayaavu, azira mpisa era nga timuyondo.
Abasomesa baali bendha inho Mbwali. Yafuna ebirabo bingi olw'eneeyisaaye. Nsooli tiyafunaku naire kantu koonakoona. Maama wa Nsooli yali n'enhugu ku Mbwali.
Maama wa Mbwali yalwala era yaafa. Mughalikwa wa maama wa Mbwali yali nga tayenda Mbwali nga maama we bweyali nga amwenda.
Maama wa Nsooli yaakoba Mbwali akole buli mulimo. Yaabula ekiseera ekiringaku mu bitabo. Nsooli yaasoma ebitabo nga yeezaanhira n'okwezaanhira ayenga Mbwali ali mukukola mirimo.
Mbwali yali nga akakola bulungi mu kibiina. Yabita bukalamu ebigezo bye era yaafuna ebirabo ebindi. Kino kyaluma inho maama wa Nsooli.
Lwali lulala, maama wa Nsooli yaakoba Mbwali amuwerekereku ku nhandha okunhona amaadhi. Bwe baatuuka ku nhandha, Yaakoba Mbwali asene amaadhi aye agaseneku awaleeyi afune amaadhi amalungi. Amayengo gaidha gaatwala Mbwali.
Maama wa Nsooli yairayo eka. Nsooli yaabuuza maama we Mbwali yaali. Mbwali ali kunhandha
ni mikwano gye. Aidha kwiranga."
Obwire bwe bwaziba, Nsooli yaaja okunoniaku muganda we ku nhandha. Yaayeta eriinha lye, "Mbwali! Oligha?" Nsooli yaawulira, "Ndi munhandha. maama answire munhandha."
Nsooli yaatambulira ku nhandha nga ayeta muganda we. "Mbwali! Oligha? Yaawulira kirala ekyo, ndi munhandha. Maama answiremu."
Nsooli yaagwa mu nhandha era yaatwalibwa nga bwe kyali ku Mbwali.
Maama wa Nsooli yaanholwa inho. Yafiirwa omwana we Nsooli kuba yali n'enhugu ku Mbwali. Yaasigala nga akola buli mulimo yenka.
You are free to download, copy, translate or adapt this story and use the illustrations as long as you attribute in the following way:
Mbwali ni Nsooli
Author - Christine Nyangate
Translation - Kyambogo University and Paul Wambi
Illustration - Alice Toich, Catherine Groenewald, Melany Pietersen, Venolin Keanan Govender and Wiehan de Jager
Language - Lusoga
Level - First paragraphs
© African Storybook Initiative 2016
Creative Commons: Attribution 4.0
Source www.africanstorybook.org
