Musa Ataasa Semwana
Bukheye Mulongo Christopher
Benjamin Mitchley
Olwolire nga ŋabaŋo ahaseere ahabalanganga baati Musa. Musa gamenyanga ni semwana ni bamulanga baati Musululu.
Musululu ganywanga ohuŋwa omugamba paka wiire ŋagati era Musa sigateranga humubonaho.
Semwana wa Musa ni gabanga n'agobola engo gahubbanga enduulu n'aloma ati, "Abehitundu, Abehitundu! Muuje mutaase! Namunyu ganumbire."
Abehitundu ni baŋuliranga Musululu n'ahubba enduulu, batiinanga n'obusaale, n'amafumo ko n'ebipanga ohumutaasa. Aye bagaananga n'ali mumeesi era n'ali hubya hubaguduliraho hyoka.
Semwana wa Musa geyongera ohunywanga n'ohuhubbanga enduulu mu hire ŋagati mbo baje bamutaase. Abehitundu boosi beyongera ohutiinanga n'obusaale, n'amafumo ko n'ebipanga ohumutaasa. Aye hiisi olu batiinanga hyalinga cehyene, naali hweholesa hweholesa.
Hiisi olu semwana gagobolanga mu wiire ŋagati, Musa gasisimuhanga olw'enduulu eyi semwana gahubbanga n'asunga baje bamutaase. Musa gafanianga bulaŋi amajanjaasi ga semwana. Era gaŋulirisanga semwana Musululu olu agenda mu hirema ohwola olu gahoolire hu mulyango gw'enyumba.
Lulala Musululu gagama engo owiire n'ameeye hya habuhyabuhya. Coka hu luno Namunyu gaali gehwehire ohuupi n'enyumba yiye. Musululu ni gahubba enduulu, Namunyu gamuwagala n'obuhambwe.
Musululu geteera bugali wene. Aye abehitundu baloma huloma baati, "Hudembire olugesi gesi lwa Musululu." Nga beyongera hwefunyiha n'ohweŋenyuhira.
Nga bulijo, ohwiteera hwa Musululu hwasisimusa omusani. Musa gaŋulirisa epindo ja semwana ng'olu gahoranga. Naye sigaŋulira pindo ja semwana ni jifugira ohuupi n'enyumba. Nga Musa gehala nga getegeresa bugali.
Ng'aloma ati, "Bbaabba hu luno ateehwa ohuba n'ali mu bigosi. Hu mulundi guno bifaana bya muluŋo sibyahusaaga."
Nga Musa atuuma aŋwa mu buliri, anuula ehisihi hy'omuliro ohuŋwa mu mayiga ng'apwanguha ohuŋwa mu nyumba.
Ng'atula n'alanga ati, "Bbaabba, Bbaabba!" Mu njase y'omwesi, Musa ni gabona semwana Musululu n'aŋiriŋana n'esolo ng'aŋaniha ehisihi hy'omuliro. Namunyu ni gabona ehisihi ehimesya omuliro, ng'aduluma.
Ohuŋwa hulwo Musululu sigagamayo hunywa nindi. Mu hifo hy'ohunywa, ebiseera gabiheneranga mu huganira abaana b'esomero engero ejisangaasa.
You are free to download, copy, translate or adapt this story and use the illustrations as long as you attribute in the following way:
Musa Ataasa Semwana
Author - Kanyiva Sandi
Translation - Bukheye Mulongo Christopher
Illustration - Benjamin Mitchley
Language - Lunyole
Level - First paragraphs
© African Storybook Initiative, 2014
Creative Commons: Attribution 4.0
Source www.africanstorybook.org
