Omwishiki wangye omukundwa
Uganda Christian University
Brian Wambi
Obwa kare na kare hakaba hariho omushaija n'omukazi we. Bakaba baine aboojo mukaaga n'omwishiki omwe. Omwishiki bakaba nibamweta Natabo. Abazaire bombi bakaba nibakunda Natabo kukira aboojo.
Abazaire bakakorera muhara waabo akanyungu kakye. Natabo akaba naakunda akanyungu ke, arikukunda kukazaanisa.
Eizooba rimwe aboojo bakaata akanyungu ka Natabo, kaashatagurika. Banyaanya tibaramanyire ky'okukora, kwonka bakatorotoora obwo bushatagurika, baabunaga.
Natabo akaronda akanyungu ke, kwonka tarakaboine. Akabiihirwa, yaarira, kandi yaayanga kurya ekintu kyona. Akeeshengyereza ishe na nyina na banyaanya kumurondesa akanyungu ke, kwonka baamugira ngu tibarikumanya ei kari.
Natabo akabiihirwa munonga. Akairuka yaaruga omuka, yaaza omu kishaka. Ku yaahikireyo yaatemba omuti muraingwa munonga.
Mpaho abazaire baaza kuronda muhara waabo. Ku haahweireho eshaaha emwe, baamushanga omuri ogwo muti muraingwa omu kishaka. Bakamugira ngu atemburukye, yaayanga. Baagaruka baamugira ngu atemburukye, yaaguma ayangire.
Banyaanya ba Natabo bakeerundaana ahansi y'omuti. Baatandika kweshongora, obwo barikwenda ngu Natabo ashuume arugye omu muti. Ekyeshongoro kikaba nikigyenda kiti, "Macura, shuuma tutaahe, nituza kukurondera enyungu nsya!"
Natabo yaayeshongora arikubatooreza.
Kwonka nabwo yaayanga kuruga omu muti. Kwonka munywani we ku yaizire, Natabo yaatandika kutemburuka mpora. Munywani we yaayeshongora ati, "Kanywani, shuuma tuze omuka! Nituza kukurondera enyungu nsya."
Natabo ku yaahuriire eiraka rya munywani we, yaagumizamu yaashuuma. Munywani we akaguma naayeshongora, kuhisya obu Natabo yaahikire aha butaka.
Natabo na munywani we bakashemererwa, baagwana omu kifuba, baagyenda mpora barikugaruka omuka owa Natabo.
Abaishiki ku baahikire omuka, banyaanya ba Natabo n'abazaire be baashemererwa, baatebeekanisa obugyenyi, kandi baayeta abanywani n'abanyabuzaare. Buri omwe akashemererwa, okukira munonga Naataba ahabw'enyungu ye ensya.
You are free to download, copy, translate or adapt this story and use the illustrations as long as you attribute in the following way:
Omwishiki wangye omukundwa
Author - Ritah Katetemera and Mulongo Bukheye
Translation - Uganda Christian University
Illustration - Brian Wambi
Language - Runyankore
Level - Longer paragraphs
© African Storybook Initiative 2016
Creative Commons: Attribution 4.0
Source www.africanstorybook.org
