Musankwa watakali kuyandwa amuntu
Edith Sikota Habwanda
Wiehan de Jager
ChiTonga
Kaindi, kwakali musankwa wakagalangene. Kunyina wakali kumuyanda. Nibaba bazyali bakwe, tiibakali kumuyanda. Kung'anda, wakalikunga ulakkala alikke ciindi bamukwasyi nobeebela TV.
Kucikolo, wakalikunga wakkala alikke bana bamwi banikusobana.
Wakalikunga uleenda alikke munsi abasankwa ciindi nobakalikuya kukuleta ng'ombe. Tiibakali kuyanda kweenda anguwe.
Bumwi buzuba wakayeeya kuzwa amunzi. Wakeenda limwi waakusika kucisaka. Wakatalika kuyoowa pesi wakakkomana naakayeeya kuti kunyina walikunga wamwaambauzya. Kayi kunyina wakalikumuyanda.
Wakatiinjile mucisaka kacembele kagalangene, kangasimatombe nokakaboola kuli nguwe. Kakamwaanzya akumubuzya ncaakali kuyakunjila mucisaka ciyoosya. Musankwa ooyo wakagambwa kumvwa muntu umwambauzya. Wakaambila mucembele kuti kunyina nkwaakalikuya. Nkuti buyo kunyina wakalikumuyanda.
Mucembele wakamubuzya kuti naa wakalikuyanda kugwasyigwa. Wakafwambaana kuvwiila kati, "Inzya." Mucembele wakamwaambila kuti katana mugwasya, wakeelede kuti musankwa ooyu amumyankute kumenso kusikila asalale, abote kapati.
Musankwa ooyu kunyina ncaakalikunga wacita nkaambo wakalikuyanda kugwasyigwa. Wakamumyankuta mucembele uulya. Wakamyankuta mantoongwe kumenso. Wakamyankuta mamina kumpemo a bunzuka mumatwi. Wakamyankuta busyu bwamucembele limwi wasalala akubota.
Mucembele wakalumba musankwa ooyu. Mpoona wakati, "Ulajana zyintu zyinji, zyibotu mucisaka eeci, pele utabwezi naciba comwe. Ulete buyo muyanda ngotiijane."
Wakalunduka musankwa uulya kalangila kujana zyintu zyamisyobomisyobo mucisaka. Katananjila mucisaka, mucembele wakamwiita kuti ajoke. Wakati, "Musankwa! Joka, uboole kuno!" Wakalunduka kuya kumucembele. Mucembele wakainduluka, "Utabwezi cintu akati kazyintu zyibotu mucisaka. Ulete buyo muyanda ngotiijane." Musankwa wakagunya buyo mutwe kuzumina mpoona wakalunduka.
Katananjila mucisaka, wakamvwa jwi liti, "Musankwa! Joka, uboole kuno!" Musankwa ooyu wakatalika kunyongana. Taakazyiba ncaakalikuyanda mucembele. Wakalundukila kuli nguwe alimwi. Mucembele wakati, "Ulajana zyintu zyinji zyibotu mucisaka. Pele ulete buyo muyanda ngotiijane." Musankwa alimwi wakagunya buyo mutwe kuzumina mpoona wakalunduka.
Mbwakacinjila buyo cisaka, musankwa wakamvwa jwi alimwi kaliti, "Musankwa! Joka, uboole kuno!" Ooyu musankwa wakajoka alimwi. Mucembele wakati, "Kondiswiilila. Ulete buyo muyanda ngotiijane. Utabwezi naciba comwe mucisaka." Akaambo kakwiinduluka malayilile aaya, musankwa uulya wakanyema. Pesi wakalundukila buyo mucisaka.
Naakasika mucisaka, wakajana mutiba uzwide mali. Wakabweza mali aayo akwaabikka munkomo. Ndilyona buyo, wakayeeya ncaakamwaambila mucembele. Wakaagusya mali munkomo akwaajosya mumutiba.
Wakazumanana kweenda. Kayaabweenda, wakabona zyisani zyipya zyibotu kampatila. Wakasamununa zyisani nzyaakasamide, wasama zyisani eezyo. Mpoona wakayeeya majwi akaamba mucembele. Wakasamununa zyisani zyipya akusama zyisani zyakwe zyakaindi.
Naakazwa waawo, wakabona muyanda. Muyanda uulya wakali yumideyumide nkaambo kazuba. Musankwa ooyu wakalibuzya ncaakalikuyanda kucita a muyanda ooyu mucembele. Kuzwa amuyanda, kwakali mutiba wa cakulya. Cakulya eeci cakalikununkila kabotu. Akaambo kakuti wakalaanzala, taakacikonya kuliimya. Wakacilya cakulya eeco.
Naakamana, wakayeeya cakamwaambilide mucembele. Mucembele wakamwaambilide kubweza buyo muyanda. Wakauyandaula muyanda, pesi kunyina nowacilikulibonya.
Musankwa ooyu wakazwa mucisaka katyompedwe. Wakaunka kuti ambile mucembele cakacitika, pesi mucembele taakalibonya kabili.
You are free to download, copy, translate or adapt this story and use the illustrations as long as you attribute in the following way:
Musankwa watakali kuyandwa amuntu
Author - Phumy Zikode
Translation - Edith Sikota Habwanda
Illustration - Wiehan de Jager
Language - ChiTonga
Level - Read aloud
© African Storybook Initiative 2015
Creative Commons: Attribution 4.0
Source www.africanstorybook.org