African Storybook - Kabaka We Nyonyi

Kabaka We Nyonyi

Wadda Cyprian

Wiehan de Jager

Lumo eira, eyonyi gyabbaire omu lukiiko. Gyatakire okufuna okabaka, nga a'bantu nebisolo owebibba. Nyonyiki ateekwa okubba okabaka?

Onyonyi omweiza nakoba, "OKokomi w'amaani era ali n'ekitibwa eky'abakabaka." Ogondi n'ayakana ati, "Awula ekisule, era abba ayeta, edoboozilye libba linakuwali." Omweiza naceera ati, "Kale Maaya olwokubba niiye asinga obunene ate airiitira oti Mpologoma." Ogondi n'ayakana ati, "Tasobola okuguluka. Okabaka w'enyonyi atekwa okubba asobola okuguluka."

Pikooko nga atengetya omuduusi gwe nakoba ati, "Ndobooza ndi nokubba okabaka. Nyirira ino." EKiwugulu ni kikoba kiti, "Iiwe wewulira iino." "Ni nze ndi nokubba okabaka olwokubba ndi n'amaiso aga siinga obunene omu nyonyi gyonagyona." Egindi ni giceera giti, "Kiwugulu tiniiwe, iwe oyaba okugona nga eisana lizwayo."

Kale tigyabrlire yala. Kale Oyonyi omweiza n'aleeta ekiseego ati oyo asobola okugulukira ngulu ino niiye eyaabba okabaka. Nigiceera giti, "Ee ee," era gyonagyona ni giguluka engulu ino omwibbanga.

Ombaati w'oku maizi yagulukiire engulu olunaku lumo nga aterembereire engulu w'ensozi egisingayo obuwanvu omu kyaalo. OKokomi yagulukiire enaku ibiri mu bireri ebya bbululu engulu w'esonzi. Naye Onsega yagulukiire kimo ino enaku isatu nga Takoma, era nga asemberera kimo kumpi n'eisana. Enyonyi ni giwulira okuzwa engulu waagyo nga onsega akunga ati, "Ni nze asingayo okubba engulu nakimo, era ndi kabaka!"

Naye onsega tete nawulira akadoboozi enguluwe, nga kakola kati, "Tinki, tinki tinki! Ni nze asinga okubba engulu nakimo, ni nze okabaka." Kaali kanadwiti akanyonyi akasembayo obutono. Kaali kekwaiite oku mayaya ga Nsega oweyabbaire aguluka okwaba engulu omwimbanga!

Onsega n'airamu ati, "Tiwansinge tete," era ni yeyongerayo nga aterembereire engulu omwibbanga. Yagulukile engulu kimo paka nga takaali asobola okweyongerayo. N'akunga ati, "Ndi ngulu wenyonyi gyonagyona, ni nze okabaka waanywe!"

Naye omu mayayage ni muzwamu akanyonyi akatono nga kakwetuka. Ni kakoba kati, "Tinki, tinki tinki, nze asembayo obutono ni nze okabaka waanywe." Onsega yabbaire adembere ino nga tasobola okweyongerayo engulu tete.

Kale n'aika ansi na kanyonyi nga kakaali keekwaite omu mayayage. Enyonyi eginaye ni gisunguwalira akanadwiti. Ni gikakuumirira, nga gyetegekere okukakunyuulaku amayaya gonagona.

Naye akanyonyi akangu angu ni kagibona nga nsunguwali ni kawuuka ni kangira omu kina ky'omusota ekyerere. Ni bakoba eKiwugulu bati, "Iwe owamaiso amanene oli n'okukenga ekiina era okakwate owekaabba kabulukamu." Kale eKiwugulu nikityaama aawo omu maiso g'ekina.

Naye eyisana lyali lyoca, era amangu ago eKiwugulu ni kigona. Akayonyi owekalonkereirye e nza, ni kabona ng'ekiwugulu kigonere, ni keesodokera puru-ru.

Ekiwugulu ni kiswala ino olwo kuleka akanyonyi okukisodokaku. Okuti ayiiga bwiire bwonkani. Emisana agona ni yebisa oku giinaye okutamubona.

You are free to download, copy, translate or adapt this story and use the illustrations as long as you attribute in the following way:

Kabaka We Nyonyi

Author - South African Folktale
Translation - Wadda Cyprian
Illustration - Wiehan de Jager
Language - Lugwere
Level - Longer paragraphs