African Storybook - Omusiani Owa Buli Omundu Yaloba

Omusiani Owa Buli Omundu Yaloba

Margaret Amateshe

Wiehan de Jager

Mundalo tsia khale, yaliwo omusiani wali yasiukha okhula buli mundu yali niyamuloba, halala na bebusi baye. Nango, yekhalanga yenyene oluyia lwaye lulenjera itivi.

Mwisomero, yekhalanga yenyene abaana bandi benyaha.

Olwa batsitsanga okhucheresia tsing'ombe, yachendanga inyuma wa basiani bandi bosi khubeera shibenya okhuchenda ninaye ta.

Inyanga ndala yakhalaka liparo okhukhama, alali shiyamanya watsia tawe. Yachenda okhula olwa yoola mumutsuru. Yali nende oburi alali yaoleresibwa ne liparo mbu abulao yesi yesi oulaboola ninaye khubeera buli mundu yamuloba.

Olwa yali hambi okhwinjira mumutsuru, omushiere, omuchafu, wasiukha yamwakana. Yamushiesia ne namureeba shiayali natsia okhukhola mumutsuru kurisia. Omusiani yauka okhuulira omundu nasunga ninaye. Yaboolera omushiere uyo mbu yali natsitsanga hosi hosi khubeera buli mundu yamuloba.

Omushiere yamureba kakhaba yali niyenya obukhonyi. Yeyama lwangu naboola, "Habwene." Omushiere yamuboolera nashiri okhumukhonya, yenya akhombe mumoni mwaye okhula alabe khandi abe ne ifwani indayi.

Omusiani shiyali nende injira indi ta alali okhukhomba mumoni mwo mushiere uyo kho anyole obukhonyi. Yachaka okhukhomba indolo mumoni mwaye, limera mumolu nende iula mumarwi kaye. Yakhomba mumoni mwaye okhula naba omusafi khandi we ifwani indayi.

Omushiere yamupira orio. Naboola, "Olanyoola efindu efinji efilayi mumutsuru, alali olabibukula ta. Underere butswa omusi kwa olanyoola."

Omusiani yerukha, niyenya okhulola efindu fiali mumutsuru fiosi. Alali nashiri okhwinjira mumutsuru, omushiere yamulanga. Naboola, "Omusiani! Kalukha hano!" Yerukha okhutsia owa omushiere yali naboola, "Endi hano." "Embolere olanyoola efindu efinji efilayi mumutsuru, alali olabibukula ta. Nderera omusi kwa olanyoola kwonyene," nakalushira. Omusiani yeyama ne omushiere namwiyamira okhwinjira mumutsuru.

Omusiani yerukha okhutsia, alali nashiri okhwinjira mumutsuru, yaulira owoyo kuboola, "Omusiani! Kalukha hano!" Yachaka okhukoyana okhulondekhana nende ka omushiere yenya. Yerukha okhukalukha weyali. "Shembara niuulire obulayi ta. Embolere olanyoola efindu efinji efilayi mumutsuru. Nderera omusi kwa olanyoola kwonyene." Omusiani yeyama ne niyerukha okhutsia mumutsuru.

Olwa yenjira mumutsuru, yaulira khandi omwoyo kuboola, "Omusiani! Kalukha hano!" Yatema okhukoyasia omwoyo yuko alali kwatsiririra kho nakalukha wo mushiere yali. Omushiere naboola, "Shendi nende obusubiri mu iywe ta. Shembara olakhola kekhulachisie ta. Olanyoola efindu efinji efilayi mumutsuru. Nderera omusi kwa olanyoola kwonyene." Omusiani yachaka okhusinyikha nokhukalushirira khwo omushiere. Yerukha okhula lwa yoola mumutsuru.

Olwa yoola mumutsuru, yalola eshikaye shitsule khwo amamondo. Yabukula amamondo nabiikha mushisiko shiaye. Lwangu ilo, yapara shio omushiere yali naboolere, mbu alabukula eshindu shiosi tawe ilali omusi. Yayinyia amamondo mushisiko shiaye nakalusia khushikaye.

Yalenga weyali nalola tsingubo tsindayi muno. Yafwalula tsingubo tsiayali nafwalire ne nafwala tsimbiakha. Khandi yapara shio omushiere yali naboolere. Yafwalula tsingubo tsimbiakha nafwala etsitsie tsingofu.

Yalenga weyali ne nalola omusi. Kwali kunialire khubeera eliuba. Yereeba shio omushiere yapara yakhekhonyere omusi. Hambi nende omusi, yaliwo eshikaye shie fiokhulia. Efiokhulia fiali nende omuya omunulu ne omusiani yali inzala. Shiyanyala okhwikalira okhulia ta.

Olwa yamala, yetsulira aka omushiere yali namuboolere. Yetsulira mbu omushiere yali namuboolere abukule omusi kwonyene. Yalenga wosi weyali alali shiyalola omusi ta.

Yakalukha, naberere, okhuboolera omushiere akali nikekholeshe. Alali omushiere yali natsire.

You are free to download, copy, translate or adapt this story and use the illustrations as long as you attribute in the following way:

Omusiani Owa Buli Omundu Yaloba

Author - Phumy Zikode
Translation - Margaret Amateshe
Illustration - Wiehan de Jager
Language - Oluwanga
Level - Longer paragraphs