Óre apá néígúéna imótonyí. Néjo kéyíéú olkínkí énaa iltúng'áná ó ing'úési. Néíkilíkuana áajo, "káa mótonyî náaku olkínkí?"

Nébuak nábo ajó, "esídáí, amû kégol náa sápuk!" Néany ái, néjo, "á-a amû meáta enkopíyia é enkítóó, náa kébebék oltoiló tenéípotísho." Néjo ái, "ninyé eishiaakíno amû kéípur énaa olng'átúny." Néjo ái, "á-a amû méídim ashómo te aí te oó ináípuko. Náa óre olkitók le oó imotónyi náa kénáre néídim ashómo te oó ináípuko."

Néjo áí mótonyî, "kénáre nááku olkitók amû káíkíshíaan naléng." Néwalikí ái ajokí, "íwúása íyie, nímira olóloshô láng." Éng'uráki siî íyie, "kááta nanú inkonyék sapúki aisúl pookí, kénáre nááku olkínkí." Nébuaakí inkúlíé áajoki, "á-a amû ílo íyie oshî airurá tenéílepu enkólong."

Néaku eitú épúo enéádó. Nébuaku nábo ajó, "óre ílô óídim ailépa ashómo enáádó te oó ináípuko náa ninyé óaku olkínkí." Nényorráa póoki. Néjo émáapé póoki áailep peê kídôl áajo kálo ólo enáádó.

Népuo kúlie te endámâ póoki. Négiróo oldóínyó oádó aisúl enkóp. Óre esídáí néílep nínye inkólong'i aré. Néílep aló shúmátá oldóínyó sápuk. Káke éílépá nínye olkúrragós inkólong'i uní. Néítashe aipiraré enkolóng.

Nébuaku enkolepó ajó, "nánú náílepá aisúl pookí, néaku nánú olkinkí."

Óre éjóítô enkolepó néjia, néning olkití tóílo te shumatá ninyé éjóítô, "Chirri, chirrri, chiiirri." Néjó áíkó injí némanikí enkití mótonyî natoonyikíne inaipúko enyéna.

Néítokí enkolepó aló shúmátá olêng. Nébúákú ajó, "nánú óílepá olêng, néaku nánú olkinkí."

Néítokí inâ kíti mótonyî abúák ajó, "chirrri, chirri, chiiiri, nánú ninyé náílepá aisúl te póoki, néaku nánú olkinkí." Nénauru enkolepó, nélaikíno anyáaki ailépa. Nédou.

Káke étódúáá nenâ mótonyí enataasá inâ kíti mótonyî. Négoro naléng. Néanyu póoki metábau peê eputú inkopír pookí.

Káke óre peê édôl inâ mótonyî ajó etagórote inkúlie, néjing atúa engúmótó oó ilasúriaa.

Néítanapí oltílo peê étôn arríp ínâ gúmótó peê eibúng tenépuku.

Káke etadálua enkólong néírowúaju. Néírura oltílô. Népuku inâ mótonyî néísik.

Óre peê édôl ajó eshomó, nékurru oltílô naléng. Néaku kewaríé aké epukú aing'orú endáa. Óre dáma néírura aisudorí.