Enarheni engakwelinye ihlangothi lomlambo iLimpopo, kuhlala uSimangaliso.Kukholwa bona uSimangaliso unamandla amanengi akhethekileko.Woke umuntu endaweni yangekhethu ukhuluma ngaye.

USimangaliso unelizwi elimnandi elibutjhelela. Uhlala ehlathini lapha avumela khona iinyoni neenlwana.Uvuma nakutjhinga elinye nelinye ilanga. Abantu basuka kude beze bazokulalela ilizwi lakhe elimnandi.

USimangaliso uneenhluthu ezide umuntu angakhange akhe azibone. Ukghona ukutjhugulula iinhluthu zakhe ngendlela athanda ngayo. Ukghona ukuzenza zinyamalale begodu azenze zibuye.Ngaso soke isikhathi nakavumako, iinhluthu zakhe ziyarhirika bese zivala ubuso bakhe.

USimangaliso ukhamba magega nehlathi loke qobe lilanga.Uyakghona ukuzwa nokunukelela ingozi.Uyakghona ukubona nalokha umuntu nakeza kuye ngeminqopho emimbi.

Ngelinye ilanga, uSimangaliso wabona kungcono azitholele bona ipilo injani ngakwelinye ihlangothi lomlambo.Wabona kungcono athathe ikhambo.Wathi nakafika emlanjeni omkhulu, warareka, “Alo ngizokuyama njani?”

USimangaliso wathula wadla amathambo wengqondo, ngemva kwalokho warhuwelela, “Amandla! Amandla!”Msinyazana kwavela ibhlorho.Wayamela ngakwelinye ihlangothi lomlambo bewaragela phambili nekhambo lakhe. Wakhamba waya kude namahlathi awaziko.

USimangaliso wazizwa adiniwe. “Ngifuna indawo engingaphumula kiyo,” watjho acabanga.Warhuwelela, “Amandla! Amandla!”Msinyazana utjani bavela kiyo yoke indawo. USimangaliso wahlala phasi etjanini obuhle.

USimangaliso wazizwa alambile. “Ngikude namahlathi. Ngizokuthola njani ukudla?” watjho azibuza.Wakhotha iindebe zakhe zomlomo warhuwelela,“Amandla! Amandla!”Msinyazana kwavela iimpoto ezinganalitho, iinkotlelo namakopi.

Ukudla kukaSimangaliso akuthandako neenselo kwapharakela ngaphakathi kweempoto, kweenkotlelo kanye nemakopini anganalitho.Wadla wasela ngendlela athanda ngayo.Msinyazana wezwa itjhada.

USimangaliso wanukelela bona sengikhona ngaphambi kobana ngitjhidele kuye.Wamemeza, “Ngubani loyo?”Ngaphendula ngelizwi elincani ngathi, “Ngimi. Ibizo lami nginguBumi.USimangaliso bekazi bona ngize ngobuhle.

“Ngilahlekile,” Ngatjho ngelizwi lami elincani.“Yewize uzokudla usele nami!” uSimangaliso wamumema.Ngadla begodu ngasela yoke into engiyifunako.Ngatjela uSimangaliso bona ngilahleke njani ngemva kokulandela umnakwethu omdala.

USimangaliso wangitjela ngekhambo lakhe lokufuna ukubona bona ipilo injani ngakwelinye ihlangothi lomlambo.Ngemva kwalokho, wamomotheka bese wamemeza wathi, “Amandla! Amandla!”Begodu ngafika njalo emnyango ongaphambili wendlu yababelethi bami.