Ifibumbwa fyonse fyaalishiba ukuti Insofu yaalikwata umoona uutali.

Lelo kale saana, umoona wansofu waali uwipi kabili uwaina, ngoolusapato pakati ka cinso caiko.

Bushiku bumo, Akaana ka Nsofu kalifyelwe. Kaleeipusha-ipusha pa cintu icili conse.

Kaleeipusha inama iili yonse.

Kaali nameepusho pa Ndyabuluba.

"Cinshi wakwatila umukoshi uutali?" efyo kaipwishe.

Kaali nameepusho pa Cipembele.

"Mulandunshi isengo lyobe lyatwa ku mpela?"

Kaali na meepusho pa Mfubu.

"Mulandunshi wakwatila ameenso ayakashika?" efyo kaipwishe.

Kaali nameepusho ayeengi pa Ng'wena.

"Bushe Ng'wena ilya cinshi ubushiku?" efyo kaipwishe.

"Wikeepushapo ilipusho ngeelyo," efyalandile banyina.

Akaana ka nsofu kalimine kaya, ninshi nakafulwa.

Tapakokwele, Mwankole alishile panshi afika napakana Kansofu.

"Tiye unkonke kumumana. Kulya walaamona ico ing'wena ilya ubushiku," efyatile mwankole.

Efyo Akaana ka Nsofu kakonkele Mwankole kumumana.

Kapitile mu matetena na ukwiminina mumbali yamumana.

Kaloleeshe mu meenshi. Bushe Ing'wena ili kwi?

"Shaani," efyalandile ilibwe mumbali yamumana.

"Shaani," efya landile Akaana ka Nsofu.

"Kuti wanjeba ico ing'wena ilya ubushiku?" efyo kaipwishe.

"Kontama panshi nalaakweeba," efyalandile ilibwe.

"Selela mupeepi-peepi," efyasosele ilibwe.

Akana ka Nsonfu kaibile panshi saana.

"Nka!" Umoona wa Akaana ka Nsofu waiketwe mukanwa ka Ng'wena.

"Ing'wena ileelya iwe ubushiku," efyasosele Mwankole nookupupuka apupuka.

Akaana ka Nsofu kaikeele pamoolu yakako ayakosa, kaleetiinta. Kaalitintile, kabili kaalitintile.

Leelo Ing'wena tayalekeleko umoona wa Akaana ka Nsofu.

Umoona wa Akaana ka Nsofu waalitiintike kabili waalitiintike.

"Fulukutu!" efyo Akaana ka Nsofu kaaponene icanuma.

Ing'wena yalubile na mumenshi.

Yaaliifulwa pakupusumuna ifyakulya.

Akaana ka Nsofu kaloleeshe umoona wakako. Umoona waalitintika kabili waalileepa saana.

Kaalifilwa ukumona apo umoona waapelele.

Umoona waiko waalileepele saana icakuti Akaana ka Nsofu kaleesaba neefisabo ku misambo iitali.

Umoona waakako waalileepele icakuti kaleeisamba pamusana namenshi. 

Ukutula apo, insofu shonse shalikwata umoona uutali.