Bantu boonse balizyi kuti muzovwu ulaa mpemo ndamfwu.

Pele kale-kale, mpemo yamuzovwu yakali mfwaafwi ineneede.

Yakali mbuli bbusu kubusyu bwanzovwu.

Bumwi buzuba, kazovwu kakazyalwa. Kakali kacenjezu akuyandisya kuzyiba zyintu zyoonse. Kakalijisi mubuzyo kubanyama boonse.

Kakalikunga kalabuzya-buzya kucinyama cili coonse ncikabona kujatikizya bube bwazyintu.

Nikakabona ndyabuluba, kakanyongana mumizeezo yankako.

Limwi kakabuzya kakati, "Ino kayi nkaambo nzi yebo olikke mukosi wako mulamfwu boobo?"

Kakacigambidwe kubulamfwu bwamukosi wandyabuluba, meso aankako akayaana alimwi amunyama utegwa cipembele.

Kakamubuzya awalo kakati, "Ino kayi yebo lwija lwako lubosya buti boobu?"

Nkaako kakaakulijana kuli civwubwe.

Nkabela awalo kakamubuzya, "Ino ncinzi yebo meso aako ncaasubila pyu mbuli bulowa?"

Nikakabona ciwena, kakabuzya banyina. "Ino ciwena ulya nzi masiku?"

"Otusabila!" banyina bakavwiila cabukali. "Ugole mpoona aawo. Tauli mubuzyo ngonga wandibuzya ooyo peepe."

Kamvwe boobu, kazovwu kakazwa akuunka kakanyemede kapati.

Mukulaba kwaliso, muyumi cikwaangala wakaselemuka akukanana kukazovwu kati, "Konditobela, atweende kumulonga kwalo ooko nkoyakubona ciwena ncalya."

Kayi bansiku bakaamba kale kuti, "Libonene ameso kuluudwa cilakatazya."

Kakunyina akusowa ciindi, kazovwu kakamutobela cikwaangala kumulonga.

Kasike kumulonga, kakainda mumatete akwiimikila kunkomwe yamulonya.

Nikakalanga mumeenda, kakabuzya kakati, "Ndiyanda kulibonena sunu. Ino ciwena uli kuli?"

"Muli buti?" Lyakalimvwisya jwi kuzwa mumundomba wabbwe mumona mumulonga.

"Tuli kabotu," kazovwu kakavwiila. "Amundaambile buzuba bwasunu kuti ciwena ulya nzi masiku?"

"Nkaambo kaniini aako. Utabi nopenga mumoyo wako. Okuno nkooboola makami ulaajana akwaazyiba mbuli mbwaabede," lyakaamba jwi mumwala wabbwe.

"Nkooko koswena munsi-munsi kucita kuti ubonesesye."

Mbukakatii ndaswena, kakataninga akuyeeya, "Jwii!" Cajata cipanela. Kwakaba kumuka. Mpemo yoonse yakazovwu yakabbila myoo mukanwa lyaciwena.

"He-he-he-eee! Sunu masiku ulicilyo caciwena," wakaamba akusekelezya cakweena cikwaangala mbuli mbwaakali kuyaabuuluka kajokela.

Kwakali pipili-pipili kunkomwe yamulonga. Kazovwu kakalizunza akutalika kudaanyana kukwela. Basikale bakati, "Wakalilekelela wakawa."

Kakazyata alimwi akukwela mbuli mpoceela pele awalo ciwena wakali popojani uuzyaminide.

Akaambo kakukwelana ooku, mpemo yakazovwu yakatalika kuyaa kulampuluka.

"Gwala!" Kazovwu kakaliwida ooko kutozya musana.

Akaambo kakusupukwa cakulya ceelede kuti ncamasiku, ciwena wakanyema kapati.

Mpoona wakanjila mumeenda.

Inga kuti kazovwu kalange aakali mpemo yako, nkujana yalampuluka.

Kakaalilwa akwiibona nkuyakali kugolela mpemo.

Mpemo yakalampa citaambiki cakuti kakali kucikonzya kucela micelo iili mujulu kumpeleengwa yazyisamu.

Kulampa nkwampemo eeyi kwakapa kuti kakacikozya akululikupila meenda kumusana.

Eelyo kuzwa lyeelo, mizomvu zili ampemo zilamfu.