Nkuku a Jongola bakali balongwe. Pele lyoonse bakalikuyanda kuzundana.
Bumwi buzuba, bakayeeya kuti baume bbola kutegwa bazyibe mukali akati kabo.
Bakaunka nkobasobanina bbola yamaulu mpoona bakatalika kusobana musobano wabo. Nkuku yakali kweenda, pele Jongola lyakali kweendesya.
Nkuku yakabbakela bbola kule, pesi Jongola lyakaindilizya kubbakela aakabbakelela Nkuku.
Nkuku yakatalika kunyema.
Bakayanda kuti baume mapenooti. Jongola lyakasaanguna kuya mugoolo. Nkuku yakanywisya biyo bbola yomwe.
Mpoona cakasika ciindi cakuti Nkuku ayalo ijate bbola mugoolo.
Njongola yakiibbakela bbola akunywisya. Jongola yakanyunya akunywisya. Jongola yakayuumya mutwe bbola akunywisya.
Antoomwe, Jongola yakanywisya magoolo osanwe.
Nkuku yakanyema akaambo kakuzundwa. Yakazundwa cibyaabi.
Jongola lyakaseka mweenzyinyina akaambo kambuli mboyakali kulibonya ameso Nkuku.
Nkuku yakanyema.
Mpoona yakaasamuna mulomo akulimena Jongola.
Noyakali kweenda kuya kumunzi, Nkuku yakaswaangana banyina jongola.
"Sena wamubona mwanaangu jongola?" bakabuzya banyina. Nkuku kunyina nciyakaamba nociba comwe.
Kabacili antoomwe, banyina jongola bakamvwa kajwi kakalila. "Amundigwasye baama!"
Banyina Jongola bakazibauka koonse-koonse cakubikkila maanu.
Kajwi kakali kulimvwisya kuzwida mwida lya Nkuku.
"Belesya nguzu zyako zyandeene mwanaangu!" bakapozomoka banyina jongola.
Majongola alabamba kanunko kamwi kabi kabisya mukanwa.
Nkuku yakatalika kumvwa bubi, kuvwundaukwa kumoyo.
Nkuku limwi yakaasamuka kuyanda kuluka. Mpoona yakamena akuswida. Yakakola akweesyemuka!
Jongola lyakalikusesemya! Nkuku yakanyongana akaambo kakanunko kajonola katasobaninwi pe.
Yakakola nkuku kusikila liwi lyakola Jongola kuzwa mwida.
Banyina Jongola amwanaabo bakasweemuka selelele kutanta mucisamu akuyuba.
Kuzwa ciindi eeco, majoongola alimwi ankuku tazilyatani.