Mbukaaniinga! Kale-kale kwakali mulombwana wakali kutegwa Byantaka. Ooyu mulombwana wakajisi ŋombe yomwe.

Buzuba abuzuba Byantaka wakali kweembela ŋombe yakwe. Wakali kwiipa meenda aakunywa mukanongo, nkaambo aaka nkaakajisi.

Bumwi buzuba, wakaunka kuŋanda yasimukobonyina kuyakulomba nongo mpati.

Ooyu simuko wakazumina kumugwasya nongo yakwe mpati kapati kati, "Penzi lyako ndipenzi lyangu."

Nikwakainda mazuba masyoonto, Byantaka wakaunka kumubumbi akuula kanongo. Mpoona wakajokela kuŋanda yakwe.

Kanongo aaka wakakabikka munongo mpati njaakalombede kuzwa kuli simukobonyina.

Naakamana boobo, wakatukka nongo mpati kaijisi kanongo mukati.

Eeyi nongo wakaitola kuli simukobonyina wakamugwasya.

Naakasika, Byantaka wakati, "Ndajosya nongo yako, yakazyala."

Simukobonyina wakagambwa kuti nongo yakwe yakazyala nongo imbi. Wakalumbaizya Byantaka kati, "Munzi wako ulilelekedwe."

Muciindi, Byantaka wakajoka kuli simukobonyina kuya kulomba nongo alimwi.

Ino taakajisi muzeezo mubotu pe.

Mukamwini nongo wakalindilila cakukkomana kuti Byantaka ajosye nongo njaakalomba lwabili.

Kumamanino, wakaunka kuŋanda ya Byantaka. Naakasika wakati, "Ndalonda nongo yangu."

Byantaka wakavwiila kati, "Omweenzuma, nongo yako yakafwa. Ndalimunzila kuzyookwaambila makani aamause."

Simukobonyina wakakamba maanza aakwe kugambwa. Busyu bwakwe bwakazimba kubukali.

Wakakwilila Byantaka kati, "Tandinamvwide kuti nongo ilafwa!"

Byantaka wakaingula kati, "Omweenzuma kozumina zyintu eezyi. Kufwumbwa cintu cizyala cileelede kufwa. Andime ndakausa kulufwu lwanongo mpati."

Simukobonyina wakanyema kapati akuunka kunkuta kutegwa Byantaka apegwe mulandu. Mubetesi wakateelela bupanduluzi bwabantu aaba bobilo.

Wakajana kuti mukamwini nongo wakalubizya akukosola kuti Byantaka abe ngomuyobozi wanongo ifwide.

"Byantaka naakakwaambila kuti nongo zyazyala, wakazumina. Ino naakaamba kuti kufwumbwa cintu cizyala cileelede kufwa, uliluleme."

Oobu mbwaakakosola makani mubetesi.

Simukobonyina wa Byantaka waunka ku munzi wakwe kaenda mbuli nkumba.

Byantaka wakatola nongo mpati mubucenjezyu bwakwe.