Tô berien, amanya nyia ôbô alaŋaru hibokuo jio ôbô namiji anna anya Otûŋê.

Amanya nyia buo fê ôbô olobuyaŋ hitobohi jio ôbô ônyîharî miji anna anya Imatarî.

Orrîahaî nyia Ibou iko Hitobok.

Itayîrû nyia Ibou jio amanyaî ohinehinehien hunno ôfîfîlî esiojin hosi îfôhôr Hôs tôlê. Iwwotitaî nyia ohinehinehien hûa enyiahi abotie îhîŋa.

Ellê iwwoti, idiaharaî isi esiojin hosi hama many êsabit abotie.

Ajio Ibou jio Hitobok jio, "Awak efuo iwosuna eesio nyia hobeŋi awotoroi hûa ocohunie."

Abaŋ nyia Hitobok alêtên. Atî tê ebuoyaŋa honyi, abeŋ îha alêtên.

Ta amotie honyi, afuoi Hitobok iko Ibou îmaji ohinehinehien diyya. Iwiwar nyia Ibou tô osiere buo Hitobok îlîhîta tê êhalû buo abaŋ.

Adôhî nyia isi tôttô dôŋê, êttê ifuatan tôttô dial, attatî buo îdaharû tôttô faû.

Aŋuti nyia buo fê isi atua ôwôrê Hôs, êttê iko ꞌdaŋ îcûlana.

Hinyia afanyî isi diyya, igonyuni nyia isi esiojin ohinehinehien hûa ôyîhaî iyyani hutto hîdê dôŋê.

Ettê Ibou iŋerihina diyya êllê ifiriwa ꞌdaŋ. Atî, ajio nyia muk jio Hitobok, nyio aniemuno nyia inyi bêbê bêbê ta adaha buo fê oniama.

Hinyia afany Ibou jio eesio ninyia ôbôlô ꞌtô bêbê, êttê irruhio nêrrê.

Ajio jio Hitobok, "Kûak, adak îhîdê ꞌyani ôŋîda ittunyu eesio anîa."

Ittulluo Hitobok adahîna îhîdê ꞌyani, êttê îdahan kai-kai. Omîjak nyia Hitobok jio aremik inyi irrutuno tô hîdê ꞌyani.

Ilôŋôjîta Ibou êlîhîta Hitobok, êttê iwiwoŋita jio Hitobok ꞌtuar-ꞌtuar.

Hinyia attir Hitobok eesio nyia, êttê îtayîrûna egur wôtôrô. Hobeŋi nyiadî awotoroi hûa iwwoti!

Ettê Hitobok îttûrûbîaha êttê iko ꞌdaŋ ikuahuno tô hîdê ꞌyani. Buo fê ohinehine anîa tôsô ikuahuno iko eesio honyi.

Iluahino ohinehine anîa iko eesio ꞌdaŋ ihoruoŋ Hitobok.

Imûlûhak eesio Hitobok ꞌdaŋ mûlûk-mûlûk! Attatî buo Ibou itterio êdalûtta hisio tô horuoŋ Hitobok.

Anîa, aŋorio awôtôrô Ibou ahûan ꞌdaŋ.

Jio amaji alîa, itterio Ibou afuho buo ôwôtô tê êhalû honyi ꞌtau-ꞌtau.

Aŋêr Ibou agum dôŋê, tôttô tua ôwôrê, êttê iŋut tôttô mur, attatî buo ijiŋana itua dial.

Buo awôtôrô fê tê êhalû tau-tau oŋoritaî inyi.

Itayîr Hitobok tô tua hisio, êttê îtayîrûna jio ayûr ediofo.

Atî, ayôhôjôk nyia eesio nyia ihoruoŋ honyi.

Jio amaji alîa, amîjak Hitobok jio abeŋ inyiak îsîrûna jihonyi îdîmarî itua ꞌtimore.

Alô atorowwok hisio honyi anîa îfaûtta inyi.

Aniemuno nyia Ibou bêbê bêbê buo fê ahûan ara ꞌdaŋ eŋoriti wôtôrô, êttê iko ꞌdaŋ ikuaharû ika amûrîŋ-mûriŋ hobeŋ afany îhaŋ.

Hinyia aŋatak jihonyi kai, êttê igonyuna jio aŋôrôk inyi awôtôrô êmînîha îhûan.

Errê hunia hunyia ôrûmaniere Hitobok atorowwok honyi buo Ibou ôrûmak êmînîha hûan honyi.

Ittuŋo nyia Ibou jio abeŋ inyi enyiak ihoholio jio ꞌtuŋ. Anîa, abeŋi Hitobok iko Ibou inyiahi îrrîaha.