Kətsi kətsen li və Aku pfè. Ə ne mpfe ə me ə ndzàŋ vəwenə la, "Abena, Ajua, Akwasi fozhɨvə ə bi li! No ndo vi nə kəkaŋ kəwen."

Li ə vəwenə ə sə ku no ndo ghə be we ə nbasə ə wen nə nyàm a yi a kwi. Ghə ə mu gàʼ a vəwenə la, "Ghəŋ dyʉ̀ ŋwʉʼmə a nse ə zhɨ."

Aku lye kəbay kəwen nə mbàsə̀ ə wen nə nyàm ə wen ə kyemə ə dyʉ̀ nə kəkaŋ kəwen a nse ə mu sə səʼtə. Liwen bem a wen la, "Aku wù fʉ a gho?"

Aku baymə nə di. Ghə be kyemə ə dyʉ̀ nə wenə ə nyəŋmə ədyʉ̀ a nse. A ndo li vəwenə ə nkəŋ la kə Aku be a dì, ghə mu dzàŋ la, "Abena, Ajua, Akwasi, no ndo zàŋsə ə vì nə mbasə ə wen!"

Vəwenə vì li vəwenə mu gàʼ a Aku la, "Shisə no nyàm a wu koŋə no fa kəkaŋ kəko na kì."

Aku mu nyɨmlə. Ghə be soŋsə kəndoŋ kəwen a kəkaŋ ə "Akwasi kwoʼtə la nyàm əwen ə ghoʼo."

Ghə be sòŋsə̀ kəndòŋ a kəkaŋ ə Ajua kwoʼtə la ghə wen ə ghoʼo.

Be moʼo əshi a kəkaŋ ə Abena ə yen la nyàm ə wen ə yi ndìʼ ghə ghoʼo. Ghə mu gàʼ a li wen la, "Ma kəŋə nyàm ə Abena."

Li vəwenə mu gàʼ Abena là, "Ku nyàm ə wù a Aku əshi ghə wen." Tinə Abena ə nfwili ali ando ghə nko kòŋə əto kətʉ fa liwen, ghə mu ku nyàm ə wen a Aku to ku.

Aku mu gàʼ la, "Nyàm ghen ə fwomə." Ə mu ŋwʉʼmə a kəkɨ ə mu sə zhɨ saŋlə.

Pim! Pim! Wù baʼlə milik mə nzhʉ̀ mə toŋ ə soŋ fa kəbəŋ. Ghə ə nyiŋə no akwi fənkwen fə ghoʼo fə ali fə kiʼ tò fəsoŋtə la nyɨŋ.

Andiʼ ali mu Aku ə nkoŋə milik mə nzhʉ̀ mə. Li vəwenə mu gaʼa la, "Abena ku kəmbò ə komkə a mò. Ma kəŋə ə zen milik mə nzhʉ̀ mə a ghəŋ no vətsèm." Abena mu vì nə̀ kəmbò na kì.

Li ə vəwenə mu gàʼ a wù milik mə nzhʉ̀ mə la, "Ku vəkà." Ghə loʼ əko ə yi ə mu gətə a vəwenə no vətsèm.

Aku mu taŋtə, "Mùʼ, bò, taʼ , kà." Ə mu be lye ghə wen milik mə nzhʉ̀ mə ə yen la ghə ntyətə. Ə lye ghə Akwasi ghə tyətə chò ghə wen.

Ghə be soŋsə kəndòŋ a ə lye ghə Ajua ə yen la ghə ntyətə chò no ghə vəwenə vətsèm. Kənyʉ̀ ə kyi kə mù bòŋ a wen. Ghə̀ mù nàyn la, "Ə yom ghoʼo chò no ghə viʼ vətsèm."

Ghə mu be kwoʼtə la yi ko təmə lye ghə Abena. Ghə boʼsə ə lye ghə Abena ə mu boʼo chʉ wen ə dì.

I vəwenə mù bèm a wen la, "A dìʼ gho a Aku?"

Aku mu dì ə dyʉ̀ to nə mbì ə kyemə ə wen ə wen a nse.

Li vəwenə mu sə diʼ ko ghə be lu saŋlə̀ byiʼi a ghə nko kòŋ la Aku ə ndì.

Li vəwenə mu gàʼ a Abena la, "Sensen ku yə a Aku əshi ghə wen."

Tinə a Abena fwi, ali ando ghə nko koŋ ə to kətʉ fa li wen, ghə be ku to ku. Ghə mu sə myɨmlə ando ghə nlye kəmpfi kə milik mə nzhʉ̀ mə.

Aku mu dèm la, "Mmmmm! ə gàʼ la milik mə nzhʉ̀ mə ghen ə mu boŋə." Ghə boʼo əchʉ ə wen ə mu lɨm.

Ghə bè bvʉtə kəblə ə zɨmə ə bè chʉ milik a mì fa wenə achʉ̀ .

Lì wen bè bèm ''La adìʼ gho?'' Ghə dì gàʼ la milik mə nzhʉ̀ men mə ə lwì.

Li vəwenə mu shi milik mə nzhʉ̀ mə na yì ə mwòm. Ando ghə mwomə ghə kàs əkəʼ əwen ə gàʼ la, "Woghèn dìʼ alə mu ghə byif li."

A zhʉ a ghèn lì vəwenə mu gàʼ a wen la. "Nkɨ a Aku, luwèn lə wù zì ko wu be a kiʼi milik mə nzhʉ̀ mə kədyàŋ. A wu yen li luwèn la kəmbàŋbàŋ kə ko bòŋ?"