Khale-khale ho ne ho na le ngoanana eo lebitso la hae e neng e le Moitheri.

Moitheri e ne e le ngoanana ea buang haholo. Leha e le hore 'm'e oa hae o ne a mo hlokomelisa hore a se bue haholo.

Moitheri ha a ka a mamela.

Rakhali oa Moitheri o ne a lula ka mose ho khohloana e ka lehlakoreng la motse oa bo Moitheri.

Ka tsatsi le leng eaba o oa kula. Ho ne ho sena motho ea mo hlokomelang.

'M'e oa Moitheri o ne a phathahane.

Nako e ne e se e ile e le bosiu ha a fa Moitheri lijo hore a li ise ho rakhali oa hae ea kulang.

Tseleng, Motheri a kopana le Khokho.

Khokho e ne e le lefirits'oane le neng le iphethotse motho.

Khokho ea botsa Moitheri, "U nkileng?" Moitheri a araba, "Ke nkile nama, mahe le lebese."

'M'e oa Moitheri o ne a ile a hlokomelisa Moitheri hore a seke a bua na o nkileng.

Moitheri a boela a re, "Ke isa lijo ho rakhali oa ka ea kulang."

Khokho a nyeka molomo oa hae ka ho nahana ka nama eo Moitheri a e nkileng.

Khokho a matha ka potlako pele ho Moitheri ho ea ntlong ea rakhali oa hae.

A koenya rakhali oa Moitheri a ba a ikoahela ka kobo ea hae.

Ha Moitheri a fihla, ho ne ho thotse ka tlung.

O ile a kena kahare, eaba oa hoelehetsa, "Rakhali u hokae?"

Moitheri a se ke a utloa lentsoe la rakhali oa hae. Moitheri a kena ka kamoreng e kahare moo rakhali oa hae a neng a robala.

O ile a makala ha a bona motho ea ikupelitseng ka kobo e kholo.

Moitheri a botsa, "Rakhali, hobaneng litsebe tsa hau li le kholo tsatsing lee?"

Khokho ea arabela e le ka tlasa kobo e kholo. "Hore ke khone ho u utloa hantle."

Moitheri a botsa hape, "Rakhali, hobaneng mahlo a hau a le maholo tsatsing lee?"

Khokho ea arabela, "Hore ke khone ho u bona hantle."

Moitheri a botsa lekhetlo la hoqetela, "Rakhali, hobaneng molomo oa hau o le moholo tsatsing lee?"

Khokho ea arabela, "Hore ke khone ho u ja ke u koenye!" Ea qhoma ho tsoa betheng eaba e koenya Moitheri.

Moitheri a 'na a tsoela pele ho bua leha a se a le ka mpeng ea Khokho.

O ne a botsa lipotso tse ngata.

Qetellong, Khokho ea khathala ke lipotso tse ngata tsa Moitheri. Ea khetha ho mo hlatsa.

Moitheri le rakhali oa hae ba ile ba pholosoa ke baahi ba motse.

Ho tloha tsatsing leo, Moitheri ha a ka a hlola a bua haholo le batho bao a sa ba tsebeng.