Pǝ̂rǝ ma ! Arà !
Ampǝrǝ n fǝl wuu ace atɩ ri ʊshilè nʼaŋɔrɔ. Ba ɖa ba ɖa ma ni, na gʊyà ʊshilè a tɔɔ niya na ce a tɩ jêɖe ʼʊnyeŋka aŋɔrɔ. ʼƱnyeŋka aŋɔrɔ aɖe ɖa gaja laŋ na nsaʊ nsaaka. Nʼʊshilè ʊ lǝ ashee aɖǝla wàà : « N tǝ ma cee kɔ̂ɔ. »

Ʊshilè ʊ fǝl ma, nʼabʊnʊ ɩ kan kaku­ro ɩfɔnɔ, aɖʊwaa ʊnyǝŋkrǝ ʊ kpa ɩ.

Na gʊsǝrǝ nʼàyó ɩ sǝba na bɔ bɔ nʼɩwor. Gaɖuɩ àyó ɩ cam ʊnyana abǝɖa bǝɖa kabɔ na gaɖu ma na gǝŋ.

Ŋkǝŋ na gaja ga sǝba na tulo nʼʊnyana. Naa apra fasʊʊ.

Nʼaɖǝla kɩcine ɩ pɩyɛ ɖaa ɩ na ŋǝ alesʊra ɖe ma. Ɩɖe tɩ fʊr anyinekoi tuutuuma.

Na bʊto bʊ sǝu nɖulinya ŋŋunii.

Katam ɖe, ʊshilè ʊɖe tɩ kpeɖe ʊ pâla ʼʊnyeŋka aŋɔrɔ na gaja kansaʊ nsaaka. Ŋkǝŋ na ba cǝra bawor nʼaŋɔrɔ nʼʊ ye shɛʊ kaaɖu.

Gaja ga kɔɔ ŋǝ ʊshilè ma, na kʊcine ʊ kǝr na ga pra buruu. Nʼabʊnʊ ɩ kɔɔ kara kɩtoko basoŋsono gʊbɔ gʊtolo kǝbaja.

Na gʊsǝrǝ gʊ ta ace atɩ ɖa atǝn. Ŋkǝŋ na àyó ɩ bɔ kɩla naa asǝba gɩlɛʊ.

Nʼɩ san nʼaɖǝla ɖaa ɩ kɔɔ ŋǝ gʊyà ʊshilè ma. Nʼɩ fǝl gʊcǝrá.

Nʼaŋɔ tuutuuma ɩ sǝba na ɖoo nʼatǝn na sala ɩwor. Na ɖulinya aŋunii a pra aske.

Kpaarɩ, na gʊyà ʊshilè a kaɖa ɖu­linya aŋunii kaŋkomo. Naa alǝ wàà : « N cee lǝ anyɩn gɩshɛbʊ wàà, n tǝ ma kɔɔ pɩ̂. »

Ampǝrǝ kaayala jɩ gǝŋ.

Ce livre a été traduit et publié par l'équipe anii de SIL à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.

Mbʊpá njala nɖe n tɩ lǝ atʊ ɖaa ʊshilè ʊ ce atɩ jeɖe 'ʊnyeŋka aŋɔrɔ ma.