Jio aduri ꞌdaŋ hutto misihi Afîrîka.

Afure hoŋ Ohûrrak. Araî aŋasi hoŋ ꞌtômôn.

Emanya hôhôî iko haniyoŋ Ikuma. Araî aŋasi Ikuma ꞌtômôn hohunihoi.

Emanya hôhôî iko monyoŋ, îyaŋ, illa hôhôî ôllô odiha ꞌtô, Iruaŋi, iko eŋok hôhôî, Mûadaha.

Many fê hewwotu Ottuloi-epieres imiji, alûfa amanya hôhôî.

Omûta lûŋa ahutti-ahûanyanî anîa, atî oremik inyi îtaŋuaî hôhôî bêbê bêbê. Obeŋ Ottuloi-epieres îgîgîa, oremik atulo iŋuaî bêbê.

Ejîrîŋa nî ta abîaŋan hoŋ îbala iko ôrrîahat hoŋ.

Ijîrîŋa Iruaŋi ta abîaŋan honyi oremik îfôny ôrrîahat honyi ta attôŋô.

Ijîrîŋa buo fê Ikuma ta abîaŋan ôrrîahat honyi oremihini îrrînyana êlata-hûtûk honyi ihutuhe hosi.

Ara îyaŋ ahafianî îttalîa ôttô bôrê gala. Itinyiaŋio monyoŋ aŋahî iko ajasio îbôrê gala.

Ofuoi isi motie-motie îgêmîta hosi, buo Ikuma omijio hôhôî îhaŋ.

Anya ônyîharî hôhôî Bêkê. Imaruak inyi bêbê buo fê owon iko aŋuaî taji.

Obeŋi awahî ôbô atulo ôlô îgêr honyi oŋitek hûna. Ifiriwa Ottuloi-epieres jio amaruahi bêbê.

Ebeŋ hôhôî êwak itiwotonia jihonyi aŋuaî.

Alla attohu îyaŋ êgîama, ôlô fê imijuno Bêkê buo fê îyak inyi aŋahî huno hêtêhî ideuno.

Itahî îyaŋ aŋahî hûa îkat-haji/îkahaji Bêkê, nyio obeŋi awahî inyi ojiŋak itua haji.

Motie-motie, ôlô Ikuma iwohuno aarî tô mosura ênnê îlîaha ꞌtô.

Igonyu inyi aatî ômûk iyyafatie emuhita-hômôm, buo ômûk obeŋi iyyafatie. Ihûhûmû Ikuma emuhi-hômôm honyi tô bôŋô ênnê ilurottia inyi ihou.

Ofiniatio inyi ahas honyi ta haŋ. Buo hônyê oŋorottia ayyani-hanî îhas hosi.

Alla ara fê attarî, itiyiu hôhôî îyaŋ jio:

"Iyyafatiete emuhi-hômôm aŋejuk oŋitek ꞌdaŋ. Ofinia ahas hôî ta asebun many asêt-sêt 20 êllê îfany iyye jio ôbô amaji. Ottuhok êêtûk iko emo hôî êllê îyala iyye kuyya buo fê êllê îbak iyye emo."

Ettê hôhôî iruhonia, "Eee, îyaŋ!"

1. Ofinia ahas hôî ta aarî.
2. Ofinia ahas hôî ta asebun.
3. Ofinia many asêt-sêt 20 kuyya îhîana dêê tô 1-20.
4. Ijôlû asebun addi ta aarî hunno olibori ꞌtô.
5. Opôtô ahas ta abôŋô ônnô olibo ꞌtô.
6. Anîa, alibori ahas hôî!