Kwaiyepo nezimombo redede zigurutu. Raiya nekundhla huru yairiteera mukuwo weshe.
Zidede iri raiya neudzvinyiriri husingabhuyiki.
Asi kundhla iyi yaingawo nematede amweni ane mituru yakakurawo.
Izvi zvaiita kuti matede amweni ahlupheke kuziya wekuyayeya.
Zuwa rimweni makudo airiteera akati, "Mambo mungaita ekudini kuti tiite gwinyiso rekuti ndimwi muri kutituma?"
Zidede riya rikati, "Mwakona zvibochwa zvangu, ndichagqoka mucheka mumusoro mwangu. Mweshe munofanirwa kuyayeya zvendinobhuya mwazwa,"
Makudo eshe akabonga
Dede rimweni rakasunga mucheka mumusoro mwerekuhlupha riya.
Rakati, "Kuqaya nyamashi, chiro cheshe chendinonge ndaronza munochiita mwazwa. Andidi unophungeya."
Raiti rikathomuka amweni aithomukawo, rikagara pashi amweni ogarawo.
Raiti rikachwereredza amweni aichwereredzawo.
Ngekuhamba kwakaita mukuwo mucheka uyana wakaqaya kushinya mbichana mbichana.
Rarwadziwa zidede riya rakagara pashi rochoobata musoro ngenyara rikati, "Mucheka uwu ubaari kundirwadza."
Makudo amweni eshe akagara pashi ochoobatawo misoro ngenyara. Akatiwo, "Mucheka uwu ubaari kundirwadza."
Zidede riya rakaganya, "Haiwa!, ndiri kubhuyisa pheya!" Amweni oochotiwo, "Haiwa!, ndiri kubhuyisa pheya"
Rakaibongomora mphere, "Maiwee, ito iyi iri kundiuraya!" Amweni akatiwo, "Maiwee, ito iyi iri kundiuraya."
Zidede riya rakazvichinywa rikazvigira pashi. Amweni akariteedzera akazvirigirawo pashi.
Rakaqaya kubinyauka binyauka rikawira mumawere. Amweni akabinyaukawo akawirawo mumawere
Zidede riya rakazofa ngezvironda zvekuwa.
Makudo amweni eshe akakuwara asi akapona