Kalakala kwaliji kwana mwali lina lyakwe lyaliji a Kalabushe.

A Kalabushe ŵaliji ŵamkamwa. Atamose kuti mama ŵawo ŵasalile a Kalabushe kuti akaŵecetaga mnope, ŵalakwewo nganapikanila.

Mama ŵakulungwa ŵa a Kalabushe ŵatamaga mu upande wine wa musi wa Kalabushe.

Lyuŵa line mamawo ŵalwasile. Nganakola mundu jwalijose jwakwakamicisya.

Mama ŵawo a Kalabushe ŵakwete masengo gejinji.

Kwaliji kuli kuswele piŵapaga a Kalabushe yakulya yakuti akape ŵakulwalawo.

Ali mkwawula a Kalabushe ŵasimene ni a Sinson.

A Sinson ŵaliji litunu lilyalambucisye kuŵa mundu.

A Sinson ŵausisye a Kalabushe kuti, "Ana mjigele cici?" A Kalabushe ŵajanjile kuti, "Njigele nyama, mandanda ni mkaka."

Mama ŵawo a Kalabushe ŵaliji ali ŵasalile kala a Kalabushe kuti akasajuwula yajigele.

A Kalabushe ŵatite soni, "Njigele yakulyayi kuti ngape mama ŵakulungwa ŵakulwala."

A Sinson ŵalapite ngomo syawo pakwamba kuganisya ya nyama jiŵagele a Kalabushe.

A Sinson ŵawutwice mwacitema ni kulongola kuja kuŵika kunyumba ja mama ŵakulungwa ŵa a Kalabushe.

A Sinson ŵamisile mama ŵakulungwa ŵa a Kalabushe ni kuliwunicila libulangete lya mamawo.

Piŵaŵikaga a Kalabushe m'nyumbamo pangali cicapikanikaga.

Ŵalakwewo ŵajinjile m'nyumbamo ni kuŵilanga, "Mama ŵakulungwa, mli kwapi?"

A Kalabushe nganapikana maloŵe ga mamawo. Ŵalakwewo ŵajinjile ku cipinda kuŵagonaga mama ŵakulungwawo.

Ŵalakwewo ŵasimonjile ali am'weni mundu jwine ali aliwunicile libulangete lyekulungwa.

A Kalabushe ŵawusisye kuti, "Mama ŵakulungwa, ana ligongo cici mawiwi genu gali gekulungwa mnope lelo?"

A Sinson ŵajanjle ali ciliwunicilile libulangetelyo kuti, "Kuti nampikaneje cenene."

A Kalabushe ŵawusisye soni kuti, "Mama ŵakulungwa, ana ligongo cici meso genu gali gekulungwa mnope lelo?"

A Sinson ŵajanjile kuti, "Kuti nam'woneje cenene."

Pakumalisya a Kalabushe ŵawusisye kuti, "Mama ŵakulungwa, ana ligongo cici pakamwa penu pali pekulungwa mnope lelo?"

A Sinson ŵajanjile kuti, "Kuti namtawune!" Ŵalakwewo ŵasumnbile kutyocela pa cindandapo ni kwamila a Kalabushe.

A Kalabushe ŵajendelecele kuŵeceta atamose ali m'citumbo mwa a Sinson. Ŵawusisye mawusyo gejinji.

Pambesi pakwe a Sinson ŵapesile ni mawusyo ga a Kalabushe nipo ŵalukwile a Kalabushewo.

Ŵandu ŵa m'musi ŵakulupwisye a Kalabushe ni mama ŵawo ŵakulungwa.

Kutyocela pelepo, a Kalabushe ŵalesile kuŵeceta mnope ni ŵandu ŵangamanya.