Nguku ni Lijongolo ŵaliji acimbusanga. Nambo ndema syosope ŵatendaga yakuti amanyice ŵakwapunda ajawo.

Lyuŵa line ŵaganisiyse kuti apute mpila wangongolo kuti amanyice ŵakupakombola mnope.

Ŵajigalene kuja ku luŵala lwa mpila ni kutanda kuputa mpilawo. Nguku jaliji jakuutuka nambo ngalipunda Lijongolo.

Nguku jauputile ni kwausya kwakutalika, nambo Lijongolo lyaujausye kwakutalika mnope. Nguku jatandite kulukala.

Ŵaganisiyse kuti apute mpila walingana pa golo. Pandanda Lijongolo lyatemi pa golo. Nguku jamwesisye cigoli cimpepe.

Kaneko jayice ndaŵi jakuti Nguku jitame pa golo.

Lijongolo lyaputile mpila ni kumwesya. Lijongolo lyatyasisye njomba ni kumwesya. Lijongolo lyaputile mpila ni mtwe ni kumwesya.

Lijongolo lyamwesisye yigoli msano.

Nguku jalukele ligongo nganijipunda. Ngukujo jalepele mwakusakalisya.

Lijongolo lyatandite kuseka ligongo lyakuti ajakwewo ŵakusyaga ngani jangali mate.

Nguku jalukele mnope mwanti jajaseme kukamwa ni kulimila Lijongololyo.

Ngukujo pajajaulaga kunyumba jasimene ni mamagwe Lijongololyo. Mamawo ŵausisye, "Ana mum'weni mwanace jwangu?"

Nguku nganijiŵeceta cilicose. Mamagwe Lijongolowo ŵadandawile.

Kaneko mama ŵa Lijongolowo ŵapikene tuloŵe twamwana. "Mungamucisye mama!" Twapikanice m'yo tuloŵeto.

Mamawo wasosilesosile ni kupikanicisya cenene. Maloŵego gatyocelaga mkati mwa Nguku.

Mama ŵa Lijongolowo ŵagumisile, "Mkamulicisye masengo macili genu gapambali mwanangu!"

Majongolo gakusakoposyaga liwungo lyangalumbana ni kunyalaikasya mkamwa. Nguku jatandite kulwala.

Nguku jatesile ndulo. Kaneko jamisile ni kulukula. Kaneko jajasamwile ni kosomola.

Lijongolo lyaliji lyakunyalaya kulilya!

Nguku jakosomwele mpaka kulilukula Lijongololyo.

Mama ŵa Lijongolo ni mwanagwawo ŵakwesile mu citela kuti akajuŵe.

Kutocela pelepo nguku syosope ni majongolo ŵaŵele amagongo.