Kali-kali nyama zengavi malundi.

Zosi zakwaŵanga.

Wanthu ŵija ndiwu ŵenga ndi malundi, ngeningo Magulu wanguŵapasa.

Zuŵa linyaki, Magulu wanguŵanaŵana kuti wazipasi malundi nyama zosi. Wakhumbanga kuti nyama ziyendi.

Wanguzikambiya za makani anga.

Nyama zingukamba, "Ntchinthu chamampha kuja ndimalundi."

Zingumba sumu ndi kuvina.

Nyama zingukamba kuti chenga chinthu chakusuzya kukwaŵa.

Zavwanga kuŵaŵa.

Zuŵa lo lati lakwana, nyama zinandi zinguluta kunyumba kwaku Magulu.

Kadyamusonga, nkhalamu, njovu, akalulu, amung'ona ndi tuyuni anguma pamuzeli.

Nyama yeyosi yingupasika malundi nganayi.

Tiyuni tingupasika malundi ngaŵi.

Chechosi chingusintha ŵati ŵalonde malundi.

Nyama zinyaki zingukondwa ndipu zinguvina. Kweni zinyaki zawanga.

Zinguluta kuchiŵalongo ŵanthu.

Nyama zingukamba, "Tezemukwaŵa so cha."

Bongolo ndiyu wenga paumalilu. Magulu wangufumba, "Kumbi pe weyosi pavuli paku?"

Bongolo wangumuka, "Awa, Ndini waumalilu."

Magulu wanguŵanaŵana, "Ngwaumalilu. Ndichiti nangu uli malundi ngosi anga?"

Magulu wangumuninkha bongolo malundi ngosi ngo ngangujapu.

Bongolo wangukondwa ukongwa. Wangukamba, "Ndiyendengi mwaluwi kuphala wosi."

Bongolo wati waluta, njoka inguza kunyumba kwaku Magulu. Yingumukambiya Magulu, "Chondi ndininkheku malundi."

Magulu wangukamba, "Ndaninkha kali malundi ngosi. Wenga pani?"

Njoka ingumuka, "Ndingugona ukongwa."

Magulu wanguluta kuchilelesya asani penga malundi ngo ngangujapu.

Iyu wangungasaniya cha.

Magulu wanguikambiya Njoka, "Pepa. Palivi malundi ngo ngajapu." Njoka ingukwaŵiya kunyumba kwambula malundi.

Kutuliya zuŵa lenilo, Njoka igona ukongwa cha. Ilindiza kuzija wakwambiliya pamuzeli kuti izilonde malundi.