Inguku ni Kiyongolo bali pa bumanyani. Loli akabalilo kosa balwililanaga. Isiku limo wapangene ukuti bakome umpila ukuti bamwage uyo ikukoma kanunu.

Babukile kuchibanja nukwanda ukukoma umpila. Inguku yali nubwengo, loli Kiyongolo kyali nu bwengo ukukinda Inguku.

Inguku yakomile kubutali, loli Kiyongolo kyakomile kubutali ukukinda Inguku. Inguku yalyandile ukukalala.

Bapilikene ukuti, yumo akomele umpila pagolo, yumo ime pagolo akole umpila. Kiyongolo ali wakwanda ukwima pa golo. Inguku yahoshishe icigoli cimocene chitupu.

Ulu kali kabalilo akakuti Inguku yikime pa golo.

Ikiyongolo kyakomile umpila nukuhosha. Kangi kyakomile indyali nukuhosha. Sona kyakomile umpila nu mutu nukuhosha. Kiyongolo kyahoshishe figoli fihano.

Inguku yakalele fiyo nongwa yakuti yatoliwe kangi. Ubutolibwa bwake bwakindile.

Kiyongolo kyalyandile ukuseka nongwa yakuti munyake abomba finthu fya buzemphano.

Inguku yakalele fiyo. Yaliwile mulomo nukumila Kiyongolo.

Inguku bo yikugomokela kumwabo, yalyagene nu mama wa Kiyongolo. Mama wa Kiyongolol alalwishe, "Umbweneko umwana wangu?"

Inguku yitayobilepo nakamo. Mama wa Kiyongolo asulumenye.

Papapo mama wa Kiyongolo apilike kalishu kanandi. "Nthula mama!" kabilikile kalishu.

Mama wa Kiyongolo aketile kosa kosa, nukupilikisha kanunu. Ilishu lyasokaga mukati mwa Nguku.

Mama wa Kiyongolo akolile, "Bombesha maka gako ga palubafu mwana wangu!"

Fiyongolo fili numunusi umbibi, kangi fitonoga. Nguku yalyandile kupilika bubine.

Nguku ya byokwile. Kangi yamilile nukufunya. yatyesemwile nu kosomola. Kangi yakosomwile.

Kiyongolo kyali kibibi fiyo!

Inguku yakosomwile, yakosomwile mpaka Kiyongolo kyasokile.

Mama wa Kiyongolo nu mwana wake bakwelile mucipiki nukubwalala.

Ukwanda akabalilo kala Inguku shosa ni Fiyongolo fyali pa bulugu.