Pǝ̂rǝ ma ! Arà !
Ampǝrǝ n ta wuu naa atɩ ri abʊŋa­jakpa na galɩŋɩ. Ba ɖa ba ɖa ma ni, baɖe ba jɩ gʊsoro gʊsoŋsono gʊkaŋkra na man na cǝr páá.

Ʊshilé ɖǝn na galɩŋɩ ga lǝ abʊŋajakpa wàà :
« Amʊsoro, ka gɩ wʊɖa ɩtanɩ na, ama ɩ saa cei gʊyá gʊ tǝ gʊ sǝ̂ba ʊjɩʊ. Mʊ nʊ gɩ yâla naa aŋǝ ɩcenji baɖǝn ? »

Nʼabʊŋajakpa a tǝlǝ ashee nɩ wàà : « Ʊ yɔ wàà, n tǝ ma sǝ̂ra alee ɩpɛ­rɛ­­tɩ bajɩka na ma, na ncè nnyɔŋkra aa ! Mʊ laŋ na kʼá pɩ̂ atɩ wʊɖa amʊ naa gɩ lêe pɩ ayala na ? » Na galɩŋɩ ga tǝlǝ na kʊsoro wàà : « Amʊsoro, n rǝŋǝ. Gacǝŋ gɩteŋshile n tǝ ma pɩ̂ atɩ wʊɖa akɩ naa gɩ lêe ɩpɛrɛtɩ baɖe. »

Gʊyá kʊshilé abʊŋajakpa a toŋo ʼɩpɛrɛtɩ afǝl ŋkǝŋ. Na gaɖulǝŋka jɩ a ŋǝ bɛrɛ banyɩʊ ba na bor ma. Nʼa kɔɔ nʼɩpɛrɛtɩ atɩ atǝn naa akim asǝla na pɩ na yɛɛ a ŋǝ̂ gaboro.

Sáà nɖee abʊŋajakpa a kpa ŋkǝŋ ma, nʼa ŋǝ wàà, ʼʊsoro galɩŋɩ ga na cɩ ɩbobo na garaŋatʊlɩ.

Garaŋatʊlɩ ga cǝpra atǝŋǝ abʊŋa­jakpa ma, na ga fǝɖǝ agɩŋʊnʊ.

Nʼabʊŋajakpa agɩŋʊnʊ gɩ ɖa na tur akɔ̀nɔ́. Abʊŋajakpa a tɔɔ agʊlɔ aɖʊ gaboro nɩ kʼa kɔɔ na laakaarɩ na.

Ɖoo nʼʊshilé ɖe na abʊŋajakpa agɩŋʊnʊ gɩ pra gɩsɔɖɔkakoɖo, a na lige na ma wàà, kʼɩ sim aɖe a naa lêe were yɔgʊʊ na.

Amʊmpǝrǝ kɩɩja na kɩsǝi nɩ gǝŋ.

Ce livre a été traduit et publié par l'équipe anii de SIL à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.

Mbʊpá njala nɖe n tɩ lǝ atʊ ɖaa abʊŋajakpa na galɩŋɩ ba jɩ gʊsoro naa abʊŋajakpa agɩŋʊnʊ gɩ pra gɩsɔɖɔkakoɖo, a na lige na ma ma.