Ngise Alôm man Dwem lu ahuraior a kiriki ga. Ve eren akaa kpishi imôngu. We wa icam ve vine amar kpa nongu.

Yange igen yô, Alôm kaa er, "Ijende yam Dwem, aluer se hii u eren tom nongu yô se zua a inyaregh kpishi."

"Een, se lôô iyiav, se sunda, se tee ior mbagenev," Dwem lumun.

Alôm pine er, "Nahan se lôô nyikwagha?"

Dwem kaa er vea lôô ikyuleke. Alôm kpa lumun. Alôm shi kaa a Dwem er doo u man ve kar ityom. Alôm tsôr er wen un a huren inyon."

A kaa er Dwem un a kaha, un a lôô, shi un a hura toho.

Dwem vaa iyol er tom na hemba ngeen. Kpa Alôm nyiman. A kaa er tom u kuran inyon hemba taver man lun a iwasen. "Tom wam ka kwagh u kiriki ga. Me unden ikon shi me zendan inyon tugh man tetan. Man we u fatyô u unden kon ga," Alôm pase Dwem nahan.

Mkaanem man kuma Dwem. A lumun u kahan sule la tswen. Lu tom u kiriki ga. Alôm wa wegh ga cii. Dwem kaha shi lôô sule la cica un tswen.

Toho ngu menden yô, Dwem yar u huran. Lu tom u mbayev ga. Alôm tema a tema sha vande lu wan imo: "Ijende yam ka orshilen, mo mngu orwan un kwagh. Ka a er tom er ka jaki nahan, mo mngu or u tesen wen tom. Ka a kaha inya, Ka a hembe agungu, Ka a lôô iyiav, Ka a hura toho, Ikyuleke yô se sunda imôngu."

Ikyuleke ngi zulum u vian yô, Alôm gba wan amo ken sule sha mkpeiyol zendan inyon. U huren inyon ken sule lu kwagh u taver ga. A kume iusa ga cii.

Ikyuleke man kuma u sundan. Alôm kaa a Dwem er vea kar kwar. Alôm kaa er, "Mo me sunda hanmô kwagh u a mende sha tar yô. We di u sunda hanmô kwagh u lu shin nya yô." Dwem lumun er ka mhen u dedoo.

Alôm kaa er, "Mo me sunda, me been yô we di u sunda u wou." Alôm sunda ikyuleke la cica za haa ken wuna na.

Dwem yar sha u za sundan akaa a a vese shin inya yô. A time zanzan kpa a zua a kwagh môm ga. A time hanmô jiir kpa lu di amishe tsegher mande sha a ye.

Dwem mase kaven er i bume un. Ishima vihi un kpishi. A hide ken ya a akese gbilin. Aikie yô, Dwem za ken ya u Alôm a shimavihin. A kaa a Alôm er, "Ijende yam, shi se kaha sule imôngu."

Dwem kaa a Alôm er, "Kwa ne yô, mo me sunda hanmô kwagh u a vese sha tar yô. We di u sunda hanmô kwagh u a vese shin inya yô." Alôm kpa lumun. A kaa a Dwem er vea lôô kwagh gen a kera lu ikyuleke ga. We cii ve lumun er vea lôô atsaka.

Kwa ne yô, Dwem nolum er ve cii vea kaha, vea lôô shi vea hura toho imôngu. Alôm kpa lumun. Ve er tom la nongu a atsam zwa je.

Atsaka kom u kurugh yô, Alôm kaa a Dwem er a yar a za sunda hanmô kwagh u sha tar. Dwem yar ker zanzan kpa zua a kwagh môm ga. A zua a ahu a atsaka tsegher. A kur ave-ave. A hide a akese gbilin.

Alôm kurugh atam a atsaka a vesen kpishi za koso ken wuna. Dwem nengen aa sunda u Alôm yô ishima vihi in kpishi. Dwem pine Alôm er, "Er nan u nyiem nahana?" Alôm kaa er ka Dwem iyol na yange tsôr u sundan akaa a a mende sha tar ye.

Ishima vihi Dwem kpishi. A zenda Alôm er un a ov iyev. Kpa Alôm yevese hemba un. Hii shien ka je, Alôm vea Dwem gba iyongu.