ALigwena ni aLijani akatomana uganja wamahena. Akinita' ni alila' xapamu. Hindu yowa apangina' pamu.

Lixôva limu, aLigwena akavina pamahena ni kuhigala paxopoki kuhwela. ALigwena, wakakwendelela, ajaula kuxihangwa ni antangila kutenda: «Mwakapala' kulama, hibidi mmemeni nyama ja lijani.»

Ligwena, wajôwine hênehe, lixikitika pamahena, nambu njêta xênge xapangana kutenda alami mpaka kwamemena aganja vaku, aLijani.

ALijani, ukati wajawila' kwalola aganjamundu, Ligwena vavêka aLijani kunngongo waku vapeleka mpaka pakunyendeha muni.

Ligwena vatangila aganjamundu: «Kuxihangwa, andangi' kutenda: Tinami kama mwe mmemine nyama ja nganjawinu Lijani.»

Lijani lijangula: «Ata', aganja. Munamemeni. Nde' kwendelela ukepa. Nnendi paxopoki. Nakakemi ahôkolo. Vêna' akôlongwa kumbêtengana nenga. Timwamemeni mpaka kujukuta.»

Badai Ligwena akota: «Ahôkovinu-ava avi' kô?»
Lijani ajangula: «Avi' munkongo muxilumba xaxêla.»
Ligwena atenda: «Nnjau' mwakatoli mbala kwamemena.»

Lijani ahomba pangongo wa Ligwena, akwela munkongo mpaka kunani.
Nana' uganja ujomoka.