Umndeni waka Izinzawu bewungumndeni lojabulako.

Emantfombatane lamabili bekafundza kupheka nekunakekela ingadze kumake wawo.

Bafana lababili bebahamba nababe wabo bayotingela.

Onkhe malanga ngesikhatsi selidina, bebacoca ngaloko labakwentile ngalelo langa.

Babe bekavame kwecwayisa bantfwana kutsi bangayi ekujuleni kwelihlatsi. Watjela umndeni ngesilwane lesingakavami lebesihlala ehlatsini.

"Lesilwane sifanana natsi nasibabili sibekwe ndzawonye!"

Ngalelinye lilanga, emantfombatane bekadlala emfuleni. Kungakalindzeleki, ngemuva kwesihlahla, bekunesilwane lesingakavami!

Lesilwane besinemehlo lamabili, tindlebe letimbili, imikhono lemibili, kanye nemilente lemibili.

Achachatela ngekwesaba, agijima ayotjela bomnakabo ngaloko lakubonile.

Kepha labafana abazange bawakholwe, batsi, "Lamantfombatane anemanga!"

Ekugcineni, bafana behlulwa yinkabunkabu yekufuna kwati.

Balandzela emantfombatane baya emfuleni kute bayotibonela lesilwane lesingakavami.

Bafuna yonkhe indzawo kepha kuphela kwentfo labayibona tjani lobudze kanye netihlahla.

Kungakalindzeleki, beva umsindvo, base babuka etulu.

Etulu esihlahleni bekulenga silwane lesingakavami labangazange sebake basibone.

Besinemikhono lemibili, tandla letimbili, imilente lemibili kanye netinyawo letimbili. Esikhundleni sekutsi sibe nakunye kuphela, njengabo.

Labantfwana labebatfukile bagijima baya ekhaya bayobita batali babo.

Ngekushesha wonkhe umndeni besewusemfuleni utobuka lesilwane.

"Ningangilimati!" kusho silwane, njengobe sibhaca ngemuva kwesihlahla.

Nyalo umndeni besewukwati kubona kuphela lunyawo lunye lwesilwane, umlente munye, sandla sinye, umkhono munye kanye neliso linye.

"Nami ngifana nani," kuchubeka silwane.

"Kuphela lokungumehluko kutsi ngentiwa ngaba natimbili cishe tonkhe tintfo."

Ngako lena kwaba yindlela umndeni waka Izinzawu lowatfola ngayo kutsi akusiso silwane sekwesatjwa.

Bekumane kusilwane lesinesimo lesehluke kancane kusabo.