Ba ɖa ba ɖa ma ni, Kaliifatu anar a cee tɩ bǝla na nɩ wàà, a pàá na lǝ̂ bʊlei yɔgʊʊ na, ama Kaliifatu kʼa na rǝŋǝ na.
Ʊshilé ɖǝn, Kaliifatu anyaacɛnɛ a tɩ shɛɖɛ. Anyaacɛnɛ aɖe ɖa asǝla na gato gaɖǝn, Kaliifatu ampá kaŋkǝm na nsaʊ nsaaka.
Kʊshilé ɖe Kaliifatu anar agʊnyɛ gʊ toŋo. Ɩɖe tɩ lee fìrìfìrì boŋo gɩteŋshile laŋ. Na Kaliifatu anar a shee nɩ ʊjɩʊ wàà, a cê atɩ shee anyaacɛnɛ ashɛɖɛka.
A na ce ma, nʼa wa na Saamusu, ŋkʊnakʊna nɖee n cǝpra kagʊlɔ nʼarɛ̀ ma.
Na Saamusu a taba nɩ wàà : « Mʊ nʊ ʊ toŋo ? »
Na Kaliifatu a tǝlǝ ashee nɩ wàà : « Ntaŋkɔ, asǝla na bʊnanye. » Kaliifatu anar a cee kaka nɩ wàà, a pàá tɩ lǝ̂ bʊkɔ́ɩ a toŋo ma, ashee arɛ̀ ɖǝn na.
Na Kaliifatu a lǝ ashee Saamusu wàà : « Amanyaacɛnɛ agʊlɔ, a jee ʊjɩʊ. » Na Saamusu a sǝba na mǝn gʊtabara na faŋa ɖaa a fʊ̂ba ganɔ na Kaliifatu ʼʊjɩʊ ma.
Nʼa cu na ce na Kaliifatu anyaacɛnɛ agʊfalsaʊ.
A kpa ŋkǝŋ ma, nʼa mǝn Kaliifatu anyaacɛnɛ naa ɖa atǝn atɔɔ ʊni aŋkuro akan agʊlɔ.
Sáà nɖee Kaliifatu a kpa ma, gafala gaɖe ga ŋʊra. Nʼa kpa ace ncǝn naa aŋala : « Nyaacɛnɛ, ŋka na ʊ ɖa ? »
Ama, kʼa na rǝŋǝ anyaacɛnɛ ʼʊwǝlǝ na.
Na Kaliifatu a kim asǝla na anyaacɛnɛ agaɖuɖaka ŋkuncǝn. Ɩ kpa nɩ biti a ŋǝ arɛ̀ a kan ŋkuro mbʊmbɔnɔ ma.
Na Kaliifatu a taba anyaacɛnɛ wàà : « Mʊ lee ka na akatɔ ɩ sǝŋkǝla gǝŋ ? »
Na Saamusu a tǝlǝ ŋkuro nɩ wàà : « Naa ma naa rǝ̂ŋǝ akǝbʊlei gɩshɛbʊ. »
Na Kaliifatu a kɔɔ taba anyaacɛnɛ wàà : « Mʊ lee ka na ʊ wʊɖa ɩnyine ɩbʊmbɔnɔ ʊrɔŋ gǝŋ ? »
Na Saamusu a tǝlǝ wàà : « Naa ma naa ŋǝ̂ akɩ gɩshɛbʊ. »
Nʼa kɔɔ taba acǝŋǝ wàà : « Nyaacɛnɛ, mʊ lee ka na ʊ wʊɖa ganɔ gabʊmbɔnɔ ʊrɔŋ gǝŋ ? »
Na Saamusu a tǝlǝ wàà : « Naa ma sǝ̂ra amǝn akɩ gɩshɛbʊ. »
Saamusu ʼʊlǝu na boŋo, nʼa ta lii laŋ ajim atǝn naa amǝn Kaliifatu.
Kaliifatu a cee lee ŋkǝmprǝyar ma, a ɖa na lǝ bʊlei Saamusu ancǝna nɩ, kʼa wʊɖa ʊŋʊrʊ na ; aɖe tɩ taba Saamusu bʊlei tuutuuma.
Kʊboŋu nɩ, Kaliifatu abʊlitabaka tuutuuma bʊ kpa Saamusu nʼa nyantra kʊra pɩ.
Kaliifatu nʼanyaacɛnɛ ba ɖoo na nɖi akpa bapaja sul. Atɔɔ na kʊshilé na Kaliifatu a cere ɖaa ba na lǝ bʊlei shɛlɛm na basana ma.
Ampǝrǝ kɩsǝi na kɩɩja nɩ gǝŋ.
Pǝrǝ ma ! Arà ! Amʊmpǝrǝ n ce wuu naa atɩ ri gapisǝmpi gaɖǝn ba na yɩɖa wàà, Kaliifatu ma, aɖe shee lee ŋkǝmprǝyar.
L'équipe anii salue l'équipe de AfricanStoryBook et les remercie pour leur générosité et pour la licence de CC BY.
Ce livre a été traduit et publié par l'équipe anii de SIL à Bassila. Pour plus d'informations sur le projet anii et d'autres publications en langue anii, contactez-nous :
www.revue-gugu.org
+229 66 66 11 11
Téléphone et WhatsApp
Mbʊpá njala nɖe n tɩ lǝ atʊ ɖaa gapisǝmpi Kaliifatu aŋkǝmprǝ n ɖʊ nɩ nawɩya nɩ ma.
Adaptation - Mounifatou Idrissou
Illustration - Jesse Breytenbach
Language - Anii
Level - First paragraphs
Creative Commons: Attribution 4.0
Source www.africanstorybook.org
Original source
