Mamajwe Koki ekihunda makaḅeji kwa wiki nzima. Dona, Maya na Duki wanakaa na kumusaidia mamajwe Koki hukuḍe nkondeni kula nsiku ya handahu magura.

Yeo wana mbwakut̯ala na kupakia makaḅeji. Babajwe Koki njwa kuyapfiika ha masanḍuku yadzaieyo makaḅeji sokoni akayaguze.

Teksi iwapfikisa hawana langoni mwe nkonde. Waona rundo kuu dya makaḅeji geri ye gari ya Babajwe Koki.

"Kiih! Makaḅeji menji ḍugha!" Maya kamaka. "Ḅila shaka kuna makaḅeji elfu modza hapfo," Duki katseka. "Ah hat̯a! Pfangine ni Magana mawii t̯u," Dona kampinga.

Mamajwe Koki ekiwainda hapfaḍe langoni. "Ntamuuntu, nitsekea kumuona." Kawakethya hawana. "Haya nahuḍabveni kazi. Mnat̯ala na kungiza makaḅeji kumi na wawii kwa kula sanḍuku. Nina masanḍuku 20. Wawii kahi yenu mnapakia kwa masanḍuku 7 kula mmodza. Abakiyee, anapakia kwa masanḍuku 6."

Hawana wadiyowa hiḍi rundo dya makaḅeji. Wagumacha njia t̯ofaut̯i t̯ofaut̯i za kuyat̯ala ha makaḅeji. "Mimi nat̯ala hayangu mawii mawii," Maya kanena. "Natsaka kut̯ala mane mane. Niharaka," Duki kajiḅu. "Mimi nayat̯ala hayangu mahahu mahahu niwe garagara nanywi!" Dona kawajiḅu.

Hawana wayadzaza masanḍuku yotse 20. "Kazi nyema!" Mamajwe Koki kawasifu. "Tayowani hizi kaḅeji ziḅaki. Nguyuwe wangu wazitsaka. T̯aḅee huwagawie," Mamajwe Koki kaamua.

"Mpakia jumla ya makaḅeji menga kwa masanḍuku yotse? Ni makaḅeji menga yaḅakieo?" kawauza hawana.

Wora bei kwa kula sanḍuku. Makisa wamsaiḍia Babajwe Koki kuyapakia humu garini.

Waweka nusu ya masanḍuku yupfande mmodza. Na nusu yupfande jwa pfii ili huuziho uwe sawasawa.

"Karibu hujwakuisa hikazi!" Babajwe Koki kanena. "T̯a nahuyoweni ni masanḍuku mengaa hunahit̯aji kuweka kula yupfande."

Kapfachu baaḍaye, masanḍuku yotse 20 yapakijwa humu garini. Babajwe Koki kanuka kuchia sokoni.

Kat̯ara, "Nikifanikijwa kuguza hamasanḍuku yotse, ninapata fwedha za kut̯osa. Ninaweza kuwamakisa hawana nidzepfo ḍirekeḅisha hiḍi zizi dya hawa nguyuwe!"

Nyumbani, Mamajwe Koki na hawana wanyunyuzia hi mimea madzi na kuundukiza ntakantaka. Kufikia saa nt̯andahu, wotse wewa watsoka.

Mamajwe Koki kawamba, "Niwakat̯i wa jila yenu. Dze, mmanya niwaanḍaliecho yeo?"

Kanjia kuzimu kuwayehya hikiḍe awaandaliecho. Hawana wat̯eya kwa umpowe huku wakibahat̯isha wandecho yehejwa.

Epfogala, waona himifuko ya kimori chakwe idzaa! "Haya nahuyoweni ikwa kwamba mḅahat̯isha sawa! Niwat̯ayarishia kintu ga yeo?"

Mamajwe Koki kayaweka hamat̯ofaa mezani. "Niḅahat̯isha sawa!" Duki kanena kwa tsekea.

Mamajwe Koki kawambia hawana, "Kumbukani ahaḍi! Gawanani sawa kwa sawa ili kula mmodza apate hachi yakwe. Kutsewa na yuḍe jwotse adzepata vinji ambu viḍoḍo kuliko mwenziwe!"

Ḍura hawana wat̯ala mat̯ofaa mawii mawii. Wat̯ala: 2, 4, 6, 8, 10, 12, 14, 16, na t̯ofaa modza ḍibaki. Yotse kwa pfamodza yewa mat̯ofaa 17.

Wagawana haya mat̯ofaa sawa kwa sawa na yabaki mat̯ofaa mawii. Makisa hawana wayaweka hamat̯ofaa humufukoni mwao ili waipfiike madzumbani mwao.

"T̯a na huyahune ha mat̯ofaa mawii yaḅakiyeo ili hugawane kahi yehu," Duki kawauza. "Kula mmodza jwenu anapata vipande vyenga vya t̯ofaa?" Maya kanena. "Nimanya hiḍi jiḅu!" Dona kamwemweheka.

Huwo huwo wakat̯i, Babajwe Koki kagala nyumbani kuyawa sokoni. Hi gari iwantupfu nae ekimwemweheka.

"Niziguza tswe hizi kaḅeji. Sasa naweza kuḍirekeḅisha hiḍi zizi dya nguyuwe. Pia naweza kumugwiia huḍe mpwira wamaguu muutsakieo." Hawana wapiḅiga vihoihoi wamba, "Hoe!"