Kolong ang'orot, alotoma amoni, abu ekapolon Eris kitamaa kidiama eboyor lokamoyi.

Abu kitama, "Amojong ayong ani akwar apei atwani. Ekarikon lokooson eseuni ekiruman keng ering'a esorokona."

Ikokini ekapolon Eris eseuniai? Eminang'es ng'itieng daang!

Ayakar Eris akiroit. Tomea ng'iketunga namoni. Tolimok ng'itiang daang potu nawi keng.

Ayakar ng'es apeyo na apolon anierumor kisarak ng'alimoreta.

Tamataros ng'itunga keng, loger ekerea ng'irotot, lowatin daang a amoni.

Nakwaare akwar na apeyo, apotu ng'itieng daang tochununos. Apot toyeoto nabo kidong'aate.

Adokunet elap kidiami lokito, abu Ekapolon Eris towoo kiding kec. Apotu ng'itieng kimekisi ayeore ka akidong'are. Topupokis ekapolon kec iyani.

Takakanyik tama, "Etamit ayong aseun ekelunyon kang. Kotere kamina ayong esi daang, nyaseuni ayong ekelunyon. Nakaneni, aseunit ayong esi taanyut akiduang'a."

Abu Ekapolon Eris tolem akwara kikea kidiama. Tamaa, "Ipei kus lo ikeari akwara kidiami lokojokon kimar tanang ng'atomon nyedoo kop nalup, ng'esi eruwow ekaruman kang."

Arumoret Ekapon Eris akiyan, apot ng'itieng kiirasi etoil lo apolon anaabor kec. Apot king'oliasi king'olikis Etom ebunit ng'aren.

"Kotosi alorot. Apolot ayong, etiemokino ayong aruwor ekapolon," tolim Etom.

Tolem Etom akwara aa kan keng. Kinyiakaa akou keng naabor kimasa akwara kidiama. "Apei! Ng'aarei! Ng'auni!" Kigalou ng'es.

Arotokinet Etom, apot ng'itieng kianakis alakara alotoma kech. Apot kech nabo tosuros akiraret etoil alapolon aloekunit anabor kech.

Arotokinet a Etom, apotu ng'itiang daang kiyanakis echalasi elakara. Bu nabo etoil loapolon alokaku a ng'itunga.

Abu Eputir ekeri ebala, "Kotosi alorot kang. Kotosi alorot kang. Alosi ayong aruwor ekapolon. Ayakar ayong ng'ikiling'a luapolok. Arai ayong loa ang'ikiling'a. Etiemokino ayong napolou."

Abu Eputir tobong akamaliwot, kirijak akwara, tachaka kidiama lodowon. "Apei! Ng'arei! Ng'auni! Ng'omon! Ng'akan! Aaa!" kiriema.

Tachakar akwara na ng'akankapei. Abu ng'es tong'oo noi. Abu totiyou apua kidiami.

Tama ng'esi Eris, "Eputir, itachaka iyong apei kaneni irumo iyong nakon."

Arumoret, apot ng'itieng tolimut ng'akiro naikote ne, "Egogong akiduanga na! Nyepedoro Etom, tarai epolot ng'es. Nyepedoro tani Ewopet tarai erai loang'ikilinga. Mam etieng'it epedori akiduang'a na!"

Naeng'oliareta kec, nyenupa kec ng'akonyen kec.

Apot kingolikis Echom ebunit ng'aren. Elosi Echom ng'aren, ebala, "Apedori ayong. Ayeni ayong atamar apedori ayong. Apedori ayong."

Abu tolem akwara kikomok kidiama. Abu tobua akan akamaliwot, kipirik ng'aren, topor kidiama tachaka akwara lodowon. "Apei! Ng'arei! Ng'auni! Ng'omon! Ng'akan! Ng'akankapei! Ng'akankarei!" kirema Echom.

Akimarakinet na ang'akankauni abu akwara tachakun kop.

Abu Echom tong'o. Abu tong'o noi kikolesianar, ing'unung'uno.

Abu Ekapolon Eris tolimok ng'esi tama, "Mere kong'ina, Ecom,aria nakon akimarakinet apei." Nakaneni abu Echom torotok.

Apot ng'ice tieng torotokis nauyei kec. Ani eloose keci, apot king'olikis Agete ebunit alotooma ng'itieng. Alosi ng'esi aatipei, tama, "Kidarou, kidarou. Kimek etetemok. Apedori ayong. Apedori."

Kimek etetemok.

Topor ekapolon Eris aadedeng, "Kimiek! Tojong'oto amenit esuroo! Ng'ae abalanyepedorete ng'itieng luucik asubakin nee esubete ng'itieng lu apolok? Na esakia esuroo aminio alolom, einakinio ng'esi dae alolom nata ainakinio ng'itieng luce dae. Kaneni, towaa tachakaa Agete akwara."

Abu Agete kijuurok ekapolon keng, king'olia tolemaa akwara aakituk. Kikomok, ang'ikilinga ka daang aluaya nakwaan keng kipungar. Naanang'ia kidind niechakarere, topor kidiama.

Kiyang'ak, tachakaa akwara anakan irema ebala, "Ng'akan ka ng'akan erai ng'atomon." Tachakar akwara kop nalup.

Apot ng'itieng daang kililinga. Ibukakina. Ekapolon Eris kichikak keci atamar, "Kong'ina, Agete! Ng'akan ka ng'akan erai echorot loenang'ere ng'atomon. Eyakasi ng'irotin lukaalak luenangere ng'atomon."

Pe aria akiduang'a akidodiun itwaan niepolot kori niang'ikilinga. Arai akiduang'a tanyunere eteng'it lokooson! Kong'ina anyunia Agete aruwor ekeruman kang natonia ayong.