Nageng ya Ghana seleteng sa Bohlabela sa Mmeapâhia, go na le setšhaba sa balemi polaseng ya "Anomaa antua a obua da."

Batho ba polaseng ga se ba dumelelwa go ya lešokeng ka Laboraro, gobane ke letšatši la bona la go khutša.

Bontši bja batho bo be bo dumela gore go ya lešokeng ka letšatši leo go tlišetša motho madimabe.

Motseng wo go be go dula bašemane ba lesome bao ba bego ba sa rate go tsena sekolo.

Kgwedi ya Phupu le ya Mosegamanye ke sehla sa dikgopa. Ka sona sehla se, bašemane ba motse ba fela ba eya go nyaka dikgopa.

E be e le Laboraro mathapama, ge bašemane ba lesome ba eya lešokeng go yo tsoma dikgopa. Ka Labone, letšatši le le latelago e be e le letšatši la mmaraka.

Ba be ba thabile gobane ba be ba šetše ba kgobokeditše dikgopa tše di lekanego morago ga diiri tše kaenyana ba le lešokeng.

Ba ile ba thoma go di bala gore ba bone gore mongwe le mongwe o swere tše kae. Bašemane ba ile ba lebala go hlokomela gore nako e se ba šie.

Mafelelong, ba ile ba tloga ba lebile gae, ba thabile ebile ba sega ba swere magang.

Ba ile ba timelelwa ke tsela. Ba sepetše gare ga lešoka ka leswiswing. Ba lekile go nyaka tsela ya go ya gae ba palelwa.

Bošegong bjo, ba ile ba tšhošwa ke mollo wa diphoofolo tša go fapana.

Ba be ba tšhogile ba lla ge ba kitimela ka leweng go yo kutha gona. Bošego e be e le bjo botelele kudu go bona.

Ba lebogile ge ba bona seetša sa letšatši. Yo monnyane gare ga bona a botšiša ka mahlo a go tlala meokgo a re, "Re ilo dirang bjale?"

Mošemane yo mogolo go bona a re ba swanetše ba leke tsela ye nngwe ya go boela gae. Morago ga metsotso e se mekae ba sepela, ba bona noka. Ba napa ba kwana gore ba tlo thala ka bodibeng gore ba selele ka mošola wa noka.

Ba rile go fihla ka mošola wa noka, yo mongwe wa bona a ba bala go hlola gore ba feletše le gore ba bolokegile ka moka naa.

Mošemane yo mogolo o ile a lemoga gore ke bašemane ba senyane. "Ke mang yo a timetšego?" a maketše.

Ba ipadile gantšintši, fela gwa se be le yo a balago go fihla go lesome.

Ba ile ba thoma go lla, ba goeletša go fihlela mantšu a bona a ehwa. Ba be ba nagana gore yo mongwe wa bona o kgamilwe ke meetse ka nokeng.

Mahlatse, motsomi o ile a kwa dillo tša bona ge ba goelela gomme a tla go bona. O ile a botšiša a re, "Bothata bja lena ke eng bana ba ka?"

Bašemane ba mmotša gore go diregile eng morago ga go sela noka.

Motsomi o file yo mongwe le yo mongwe kotana gore ba e sware. Morago a di tšea go bona gomme a di kgoboketša, a di bala le bona. Mafelelong ba hwetša ba na le dikotana tše lesome!

Bašemane ba be ba thabile, ba sega ebile ba gokarana.

Motsomi o ba boditše gore ba se ke ba ya lešokeng ka Laboraro, gomme a ba bontšha tsela ya go ya gae.

Potšišo ke gore, gobaneng bašemane ba be ba bala batho ba senyane mola ba be ba le lesome?