Ba lapa la ga Izinzawu ba be ba phela ka lethabo. Basetsana ba babedi ba rutilwe ke mmagobona go apea le go šoma ka serapaneng. Bašemane ba babedi ba rutilwe ke tatagobona go tsoma.

Mantšiboa a mangwe le a mangwe ge ba eja dilalelo, ba be ba bolela ka tšeo ba di dirilego mosegare wa letšatši leo.

Tatago bona o be a fela a lemoša bana gore ba se tsenelele gare ga lešoka. O ba boditše ka ga sebopiwa sa go makatša seo se bego se dula lešokeng. "Sebopiwa seo se swana le bobedi bja rena re le mmogo!"

Basetsana ba be ba bapala nokeng ka letšatši le lengwe. Ka pelapela, ba ile ba bona sebopiwa sa go makatša se eme morago ga mohlare! Sebopiwa se be se na le mahlo a mabedi, ditsebe tše pedi, matsogo a mabedi, le maoto a mabedi.

Ka letšhogo, ba ile ba kitimela go dikgaetšedi tša bona go ba begela tše ba di bonego. Fela bašemane ba be ba sa ba kgolwe. "Basetsana ba dira tša botlaela!" gwa realo bašemane.

Mafelelong, tumo ya go tseba e ile ya fihlelela bašemane. Ba ile ba šala basetsana morago gore ba bone sebopiwa se sa go makatša ka a bona mahlo.

Ba nyakile gohle fela se ba se bonego e be e le bjang bjo botelele le mehlare.

Ka pelapela, ba ile ba kwa lešata, gomme ba lebelela godimo.

Mohlareng go be go kadiela sebopiwa sa go makatša seo ba sego ba ka ba se bona. Se be se na le matsogo a mabedi, diatla tše pedi, maoto a mabedi le manao a mabedi. Sebakeng sa e tee e tee bjalo ka bona.

Bana bao ka letšhogo ba ile ba kitimela gae go yo bitša batswadi ba bona. Ka bjako ba lapa ka moka ba be ba le nokeng go yo bona sebopiwa seo.

"Le se ke la nkweša bohloko!" gwa realo sebopiwa, se le gare se khuta ka morago ga mohlare. Ka yeo nako ba lapa ba be ba bona leoto le tee, lenao le tee, letsogo le tee le leihlo le tee la sebopiwa se.

"Ke no swana le lena!" sebopiwa sa tšwela pele ka go bolela. "Phapano ye e lego gona ke gore nna ke bopilwe ka go ba le ditho tše pedi tše pedi."

Se ke sona se dirilego gore ba lapa la Izinzawu ba lemoge gore ga se sebopiwa sa go tšhoša. Se no ba se bopilwe go fapana le bona.