Ya Kari mawu sammaro falinzǝ sudorin. Kunduli-a Maniram-a Doworam-a Ya Kari-a banazain kare kǝliramlan sǝbdǝ suwa woson. Ku dulidǝ falidǝ isawu-a buwuro fitǝgǝ-an banadǝ sadin. Baa Maliwu buwuwa falibesodǝga gozǝ kasuwuro saadǝ sǝladin.

Takshimaye dulidǝga gaworam kare kǝlirambe sǝsayin. Sandiye baa kare kǝlibe tǝrǝm sapkata gǝre mota dina Ba Maliwuben suron. "Wai! Falibe ngǝwu laa!" sǝ Manirambe fǝleji. "Falibe duwuma mbeji nadǝn!" Doworamye kasudu goji. "Gai! Yor india kojinba!" Kunduliye kasatsǝnyi.

Ya Kari cinnan gǝrǝjin. "Wusowo duli. Nandiga kururo zauro kurnotǝkǝna!" shiye dulidǝga lewaji. "Kuwadǝ arowo gawo cidaro. Awo nandilan mǝradǝtǝnadǝ falidǝ isawu-a buwuro sandiga nzǝkko-a, buwu falwosoro fali 12. Buwunyi sandi 20. Nandi indidǝ buwu tulur tulur tamnǝwin daji falndodǝ buwu arakkǝ tapcin."

Dulidǝ batawu baa faliben daa da. Ndunzawoso gadegade futu somsomi falidǝbe sadindǝ mazain. "Tǝmangǝna wu kakkedǝ indilaro (2s) komngin," Sǝ Maniramye gulji. Dowomaye, "Wu diyawulan (4s) komngiya raako," wono, shima duwawo. "Wu yakkǝlan (3s) komngin, gadetǝ nanka!" Sǝ Kunduliye kǝrzakkatǝ.

Tunyi dulidǝye buwu findidǝga (20) tapkada. Ya kariye kowo faraklan. "Cidando zauro ngǝla!" sǝ zazakci. "Tuwo wunowo faliwa laa kolluwa wono. Godunyisodǝ falisoga saragǝna danowo shi adǝ sandin kuntenro yangnyen." Shiye showori kaino. "Fali ndawu buwuwadǝro figǝwu? Faliwa ndawu gapso?" Shiye dulidǝga ciworo.

Awo cidaro gapsǝnadǝ kuwa buwu falwosoro taman rǝwotǝgǝ kuru Baa Maliga banaawu buwuwadǝ matoro laptǝgǝ gapso. Sandiye buwuwadǝ retadǝ shiti fal matodǝbero lapsaiya kuru shiti faldǝro retadǝ lapsaayin, nǝmkurwonza kalkaltǝro.

"Andeye tilomiro tamonyena!" Ba Maliwuye wono. "Dane ruiye, buwu ndawu kuwamison shitiwosoro rangnye tǝkkiya sando?"

Shimbe kǝmǝddǝ buwu (20) samma matodǝro lapkatǝ. Ba Maliye mato sǝsangǝ daji kasuwuro gǝrzǝ lewono. "Buwuwa anyi samma ciladǝkogadǝ," sǝ karǝgǝnzǝn manajin, "Kunguna sara godubedǝ nzasabe fandǝkin kuru dulidǝro awo tǝmazanyi dikkin!"

Suro kulobero waltiyeiya Ya kari-a dulidǝ-a kare kǝli sasatin ye lambowa kaskarlan fǝrazan ye. Sa mewun indingai sandi samma sasambarǝna. "Loktu tusundoye sǝtǝna sǝ Ya kariye sandiro gulwono. Awo nandiro kuro dawargǝna rannǝu tawuin wa?"

Sandiga ajaptǝgǝ sǝrgawo, shiye suroaro kargawo. Dulidǝ kanadinzaa kǝm sadǝna kǝnshenzǝ gǝrezain daji sandi ye taksain awo sandiro suwudinmadǝga. Sa isǝnadǝ liwu gǝmajenzǝbedǝ rungul cizǝna.

"Nda dane rukke awo sǝyinnuwadǝ kalkalwa! Abi gǝle kusku kubero nandiro dawarngo? Ya Kariye liwu gǝmajebedǝ fǝliwononya tuffa kurwum-kurwum kǝla tewurben figono. "Rui, awo gulngǝnadǝ kalkaldiya!" Dowomaye wono. Ya Kariye dulidǝro guljiwo, "Daji shartǝdǝ tangnowo. Kalkalro yangnowo! Wunduma kamanzǝga kozǝna sǝwandinba au kamzanzǝro ganawo yero waljinba!"

Burwon dulidǝye indilaro (2s) komgada. Isawudǝ: 2, 4, 6, 8, 10, 12, 14, 16-a kǝlan tuffa 1 kozǝ, jumladǝ samma tuffa mewu tuluri (17).

Daji tuffadǝga kalkalro yakkada. Tuffa indi (2) gapsa. Dulidǝ daji tuffanza buwunzaro fizaa goza fatoro kashu.

"Nda tuffa indidǝ (2) kamnye indikatande yangye," Doworamye shawariga caino. "Ndunde woso fali tuffabe ndawo fandiyen?" Maniramye ciworo. "Jawawudǝ nogǝna!" Kunduliye ci mǝmǝshinnaro.

Zai daji Ba Maliwu kasuwun fatoro kadio. Matodǝ de kuru Baa Maliwu ci mǝmǝshin. "Falidǝ samma ladǝkǝna. Kǝrmadǝ range rara godubedǝ yasakin kuru dekkel shibe manuwindǝ ye nandiro yiwuk."
"Yey!" sa duli burwu gowada.