Many beryen, owon nya obo ebou al'angaru ihang honyi.

Bwo ve, owon nya etobok ihang honyi.
Ati, orryahai nya Ibou iko Hitobok.

T'obo nolong, alo Ibou jyo Hitobok ette'jyaran, illa Hitobok; hatitifyaru obo esyo.
Bwo Hitobok ette itarrang inyi, oyyu illa hafati.

Ania, anger Ibou t'osyere honyi kokwak.
Bwo Hitobok ijifaru inyi dee nyo ilik inyi t'adaha.

Hinya afanyi'si iger hari, ette'si ilang atwa owore bwo ahwattek hosi ette'fujon.
Hinya abolo adaha hosi, adyaha ataji Ibou, ette'nyi ittong asuhe honyi.
Bwo Hitobok ette'hutonia ihalu honyi nyik nyik.

Hinya alumi'si igum donge, ett'si igonyuna ohiniehinie wotoroi oyihai itanata yani.
Ania, anger Ibou fir fir t'osyere Hitobok ette'luhina itanai yani ette'byagan iremehina.

Teya, hinya angaramahi inyi awwosuna hisyo to hide yani, ette'nyi ijyaran jyo Hitobok; illa addak ihide yani ongida iwwosu esyo eman hohyai.

Ania, adak
Hitobok kai kai. Bwo Ibou ette
ilongojita; ette’sohina iko ewwuwongita jihonyi; iyye, iyye, iyye!  Adaha kokwak obwoyo.

Ania, adak Hitobok ihide yani ette ittir ohiniehinie wotoro.
Bwo awotoro ette itturo dafaya.
Hinya igonyu Ibou afuni funi wotoro, ette'nyi ifuho.

Bwo Hitobok ette kwahino ifau; ette esyo idohina ihorwong honyi ette imuluhana ahwan honyi dang.
Hinya afelu Ibou Hitobok afer ifau, ette'nyi icaha jihonyi gur ette irumana esyo imuluhak ahwan Hitobok.
Ania, amuno Ibou ette idahina ihorwong Hitobok ette ida esyo to horwong Hitobok malak malak.

Bwo awotoro ette ingor inyi (twiny twiny or nyut nyut?) to ayili honyi; ette Ibou ifuho bwo awotoro ette itiforo inyi many jyo ekoi on'otunieri inyi.

Attati teya, anger Ibou many itwa hari iko engoriti wotoro hunia dang ette ikwahino itwa hari bulung.
Bwo awotoro ve ijifaru inyi many itwa hari.

Hinya irwat
Ibou, arasa Hitobok iwoyo yani (iwo’yani) kai bwo aji wotoro
iko esyo ette’yohojonia ihorwong honyi.

Ati t'ayiji honyi, owon etobok iko orwong honyi on'ogol ene'fau to inyi jyo obo aring ono orroho to.
Hinya iyak ettigemio hosi to ohiniehinie, ette Hitobok ileten ihang honyi.

Bwo Ibou ette icaharu itwa miji iko engoriti wotoro huno oyejani to lupak lupak ette iko inyaluk (iloyit) ahwan honyi obo emini.

Hinya atuho ettigemio hosi to awotoro, abengi Ibou iko Hitobok orrihai inyak.