Looyi yali mukazi muto ku kyalo Kosozi. Yali wa ndhaghulo ku bakazi abandi. Yavaalanga nkanda ngubbu. Nga era avaala sapatu kabaliga.

Looyi yali tayogera era takola na muntu ku kyalo. Nga ayogera yenka, yaatuuma era yaakuba mu ngalo dhe.

Ebiseera ebindi, Looyi yalonda nga emmere mu itaka era yaagirya. Tiyalwalaku, ghaire yalyanga mmere ya mu itaka. Ezira ku kyalo eyali amughaire ku bulezi, oba okumutwalaku mu supaatala okumwidhandhabaku.

Abantu ku kyalo Kasozi babona Looyi nga omulalu. Abandi bakoba bati mulogo. Baamusoomooza nga bamukoba obutagya maadhi ghalala na abantu ba Kasozi ghe bagya amaadhi ago kunhwa.

Ekiseera ekyamalima bwe kyatuuka, Looyi yali na bwa mbago, kakesa na kalobo kagubbu kukozesa ku nnimiro.

Looyi yaasimba amaido ni duuma. Yaakolanga mu nnimiro ye buli lunaku. Abantu bangi e Kasozi baayemereranga ku mbali, baamulingiriranga era baamusekereranga. Tibafaku yaalabirira ebirime bye.

Buli kiseera kye yakolanga mu nnimiro, nga ayemba ati, "Obunafu bwita! Tobanga munafu. Oidha kusiiba ndhala."
Looyi yayembanga bwa akuba mu ngalo, yaatuuma era yaakina.

Nga ghabise emyezi esaatu, ebirime bya Looyi byabala ebibala bingi. Kyali kiseera kya kukungula. Ebiduuma nga bibonheka kilagala ate nga biyaaka. Ebisusu bya duuma byafuuka bya kisitaka.

Abantu ba Kasozi baagya ewa Looyi okumusaba ku duuma na amaido. Ghaire nga yabaghanga emmere eno kyeyagalire, abantu abananfuusi bairanga baagiiba mu nnimiro nga azira yo.

Lulala, omugeni yakyala ku kyalo Kasozi. Yaabona Looyi ku nnimiro ye. Yaaba musanhufu okubona omulimo gwe yali akola. Omugeni yaamulamusa ati, "Osiibye otya!"
Aye Looyi tiyamwiramu.

Omugeni tiyategeera Looyi. Yaagya mu kyalo okumanha ebimufaku. Abantu ba Kasozi baamukoba bati, "oyo mulalu."

Okulingirira obukozi mu nnimiro ya Looyi, omugeni yeebuuza mwene ati, "Bweene Looyi mulalu?" Yaayogerera ghaigulu ati, "Kale, aye tibonangaku mukazi mulalu nga ono mu bulamu bwange!"