Eira einho, Muwogo ni Munaazi baaviiranga ku kyalo ekyayetebwanga Koowa. Baali bagonzania inho.

Baacaaliraganangaku buli lunaku. Baali balimi. Nga buli kaaceire bakola mu nnimiro dhaibwe.

Ghaaligho omwaka amaadhi gwegataagwa. Ebirime byaloba kukula bukalamu, era byonabyona byakala. Abantu ti baali na mmere.

Agho Muwogo ni Munaazi n'okusalagho.

Bwe baali baja, baayagaana omukazi baamulamusa bati, "Osiibye otya?''

Yaabairamu ati, "Nsiibye bukalamu." Me male yaababuuza ati, "Muli kuja gha?" Munaazi yairamu ati, "Tuli kuja ku kyalo ekituliinaine kunoonia mirimo."

Omukazi yaababuuza ati, "Mulimo ki gwe mughanga okukola?" Abagonzania abo baamwiramu bati, "Tughanga okufunira ab'endhuuyo n'ebisolobyo emmere."

Omukazi yaababuuza ati, "Mwenda ki okufuna emmere?" Baamwiramu bati, "Twenda otughe eitaka, n'amaadhi otulabirire bukalamu."

Omukazi yaabatwala e kaawe.

Lwali lulala olweigulo, Munaazi ni Muwogo baatakana. Nga Muwogo akoba mbu mwene wa mugaso inho okuwula Munaazi.

Ate nga ni Munaazi akoba ati mwene n'womugaso einho okuwula Muwogo.

Omukazi yaabawulira nga ali mu kisenge kye. Yaafuluma yaababuuza at, ''Muli kulwanira ki?''

Muwogo neeyasooka okwogera nga akoba ati, "Ndi wa mugaso inho okuwula Munaazi. Nkugha eminwe waafunamu omugoyo, oba waasalasala ng'oti kitoobero, oba waatogosa. Nkugha obuse obuvaamu cada, oba obusera oba embada."

"Emiti jange jisimbibwa. Amakaba gange ni byebasusa ku minwe jange mmere ya nsolodho. Munaazi akola ki?" Muwogo n'okubuuza.

Munaazi yaaseka, yaatengeesa n'omutwe era yaakoba ati, ''Inhabo, oidhukira eiva erikughoomera einho nga lirungiibwa n'omuzigo ogweminaazi? Ninze nvaaku omuzigo ogwo."

"Nkugha bwito okukola chapati, n'okukalanga ebyeike n'emamba. Wandifumbyenga otya omuunhu gw'emamba oba eiva erindi nga ozira bwito?"

"Okwongereza ku ebyo, ensansa dhange badhikozesa okusereka wemuwuumulira okwakasana. Era bwemumala okukola emirimo emikalangufu ejoolunaku, mughegheeza emyoyo gyaimwe n'ekyokunhwa ekiwoomerera, ekirimu ekiriisa ate nga kiriku ekiwovu, ekyetebwa Paamu Waini."

Munaazi yamaliriza nga akoba ati, "Ate ekiwula n'ebyo byonabyona, ebyeyo ebikozesebwa okweya mu bisenge ni ku mpya biva ku nze."

Agho omukazi yaisa ekikoowu ati, "Hmmm! Kale bakagwa mpuliire byemukobye. Ndidha kubamala entaka edo."

Omukazi yaabakoba ati, "Mwembi muli ba mugaso inho yendi. Bwemuba mwembi mukola ekiighulo ekighoomu einho, ekyokugeza nga cada nga oli kuliiraku omuunhu ogw'emamba gwebakalangiire omuzigo oguva mu binaazi."

Omukazi yaalunga envuluga ey'ebinaazi yaafumbiraku omuwumbo gwa cada. Yaayeta bakagwa be balye boona. Era baaghomerwa inho ekiiwulo ekyo.

Okuva n'olwo, Muwogo ni Munaazi baasigala nga bagonzania.