Mama Kasule abaire alikungula Kapiki okumala Esaasira. Dhaabangi, Mafaabi ni Dhaamuzungu bayamba Mama Kasule mu nimiro ye ey'eiva ku lwa Mukama enco. Olwa leero, abaana baja kuyambaku mu kubala n'okutaana Kapiki. Agho meeni Bbaabba Kasule atwale ebisaanduuku bya Kapiki abitane mu Kiya.

Ekyabula kiisa abaana ku mulyango ogw'enimiro. Basobola okubona enteenha ya Kapiki embedde okumpi ni Namunkaire ya Bbaabaa Kasule. "Wo! Kapiki omungi!" Mafaabi ayogera bw'asonkaku. "Ghaateekwa okubaagho Kapiki lukumi!" Dhamuzungu y'aseka." Ghazira ngira! Bikumi bibiri okusingira irara!" Dhaabangi t'aikiriza.

Mama Kasule ali kuteegera ku mulyango. "Bana mwenamwena, nsangaire okubabona!" Y'alamusa abaana. "Buti tuje tukole. Kiidha kubeetaagisa Kapiki n'okumutaana mu bisaanduuku, Kapiki 12 mu buli kisaanduuku. Ndi n'ebisaanduuku 20. Babiri ku imwe buli mulala asobola okutaana ebisaanduuku 7 ono omulala asobola okutaana ebisaanduuku 6."

Abaana beemerera okwetoloola enteena ya Kapiki. Boogera ku ngeri edh'endhawulo edh'okubala Kapiki. "Ndoghooza okubala owange mu 2, "Mafaabi yakoba. "Nheenda kubalira mu 4," Dhaamuzungu yakoba, "Kyangu." Nja kubalira mu 3, okubaagho endhawulo!" Dhaabangi yayaniriza.

Mu bwangu, abaana baidwiza ebisaanduuku 20. "Mulimo mulungi!" Maama Kasule y'ewunhinkirira. "Mubone, ghaligho Kapiki asigaire. Embiidhi dhange dheenda Kapiki, kale katugabaniemu ono nadho, "agha endoghooza. "Mutaanie Kapiki imeka mu bisaanduuku? Ghasigairegho Kapiki imeka?" Abuuza abaana.

Omulimo ogwiraku, gwa kughandiika mighendo ku buli kisaanduuku, olwo muyambe Bbaabba Kasule okutwika ebisaanduuku ku kyabula kye. Bateekwa kuta kitundu ku bisaanduuku ku luuyi lulala olw'ekyabula, ekitundu ku luuyi olundi, okwazayaza omugugu.

"Kumpi tumaze!" Bbaaaba Kasule y'akoba. "Ka tubone, twendayo ebisaanduuku bimeka okuta buli ku luuyi okwazayaza omugugu?"

Mu bwangu, ebisaanduuku amakumi 20 bitwikiibwa ku kyabula. Bbaabaa Kasule asuughiriza omutima ogw'ekyabula, y'avuga okw'olekera ekiya. "Obanga nsobola okutana ebisaanduuku byonabyona, "aloghooza mwene, "Ndidha kuba n'empiiya edhimala okuzimba ekiyumba ky'embiidhi nsaalirize abaana!"

Eka ki isaamba, Maama Kasule n'abaana bafukirira baasooloza n'amakaba. Okughera omukaaga, nga bonabona bakoowu. Maama Kasule abakoba,"Kiseera kya kweghonia. Muyinza okuteeba kye mbategekeire leero?"

Aingira mu ndhu okubanonera ekinaabasamaaliriza. Abaana bamulinda nga baikaikamu eno bwe bateebereza kiki ky'asobola okubaleetera. Bw'aikirira, ensagho dh'eitaagho lye nga dhizimbagataine!

"Katubone obanga muteebye kituufu! Kiki ekyaimwe ekiri mu kyagi leero?" Maama Kasule afungulula ensagho dh'eitaagho lye, enteena y'ebibala ebya kyenvu by'agwa ku imeeza. "Mubone, mbaire mutuufu!" Dhaamuzungu yaadwira. Maama Kasule yaakoba abaana, "Buti mwidhukire eiteeka. Mugabane kyagayaga! Ezira afuna kinene oba kitono okusingaku mwine!"

Okusooka abaana babala ebibala mu 2. Babala: 2, 4, 6, 8,10,12,14,16, ghaasigala ekibala 1, ghonaghona ebibala 17.

Okwiraku, baagabana ebibala baayazayaza. Ghasigaire ebibala 2. Abaana baatoola ebibala baata mu nsagho dhaabwe okutwaala eka. Buli mwana afuna bimeka?

"Ka tusalemu ebibala 2 twegabaniemu," Dhaamuzungu y'agha endoghooza. "Buli muntu anafuna ebitundu bimeka eby'ekibala?" Mafaabi abuuza. "Ndhidhi eky'okwiramu!" Dhaabangi y'afenherera.

Mu kiseera ekyo, Bbaabba Kasule aira okuva mu Kiya. Ekyabula ky'erere, ni Bbaabba Kasule ali kumwenha. "Kapiki yenayena mmutunze. Buti nsobola okuzimba ekiyumba eky'embiidhi mbagulire omupiira gwe mwayenda."
"Naagho!" abaana baaghoghoigana."