Eira einho, ghaligho abe'mikago basatu ku'kyalo Daban. Amainha gabwe nga nhiba Adebo, Nyacho ni Ntogo.

Abe'mikago bano bayendagananga inho era nga ba'mukago gwene. Era omukago guno gwaletera abamaka gabwe okwira aghalala.

Ku'kyalo kino e'kyiya kyalingagho buli lwa'kutanu, era nga ezira alima kwolwo.

Kulomera ni'Adema baali no'mwana mulala nga ni Adebo. Abazairebe tibamugalagiranga bw'eyakolanga e'nsobi. Kyamuletera okuba owo'lugezigezi.

Olwo'kutanu lulala, abe'mikago bano baja mu'kibira okunonia maidomiti. Nga benda tutwala mu'kyiya kufunamu e'mpiiya. Abazaire babwe olwaja mu'kyiya, nga bona baaja mu'kibira.

Baatuuka ku'mwiga Dome, ogwali gutumbeire einho. Ntogo yayasukana, "Ee! Tunasomoka tutya omwiga?" Nyacho ya'mwiramu, "Nasomaku nga omwiga bweguuba gutumbeire gwatuuma olubalama, mugusomoka nga mu'ghaileyo sadaaka."

Abaana tibaali nakyakusadaaka e'kiseera ekyo, kale basuubiza buusubize. Ntogo yakoba, "Dome bwondhikiriza ne'nsomoka obulungi nja kuku sadaakira maidomuti masatu e'mirundi esatu." Nyacho yeena yasuubiza kirala ekyo.

Olugobo lw'Adebo bwerwatuuka, olwokuba yali walugezigezi iye yasuubiza ati, "Dome,bwondikiiriza ne'nsomoka nja kusadaaka maidomuti mubiri emirundi esatu na amagi mabiri." Omwiga Dome gwaikiriza, "Baidhukulu, musomoke aye mwidhukiranga okutukiriza byemusuubiiza."

Abaana bwe'baasomoka omwiga obukalamu, baigira mu'kibira. Mangu ago baidhuza emifuko gyabwe ni'maidomuti. Bwebaali bairayo kabiri batuuka ku'mwiga kumulundi guno amaadhi gaali gatumbeire inho okusingaku ghegaali okusooka.

Ntogo ni Nyacho baatuukiriza kye'basuubiza era basoomoka bukalamu. Olugobo lw'Adebo bwerwatuuka, yali azira magi geyasuubiza. Era omwiga tigwamwikiriza kusomoka.

Obwire bwali buli kuziba. Baine baaja mangumangu eka bakobera abazaireba Adebo ekibairegho. Kulomera yaaja okuyambaku mughalaghe.

Adebo yatya inho kuba yali yenka. Bweyali asomoka, yatandiika okudimira.

Kulumera bweyatuuka kumpi no'mwiga yaawulira olwembo. "Ekinoni ekyiguluka nga kyemba! Jja okobe maama, Jja okobe bbaabba, Baleete amagi mabiri. Dome alikuntwala!"

Muzei Kulumera yayangugha okutuuka ku'mwiga yategeera nga mughalaghe yali ali kudimira mu' mwiga. Yalengera bwanviiri dhamughalaghe.

Yayangungugha mangu okugema enviiri dha'mughalaghe nga agezaaku okwenda okulamya Adebo okufiira mu'mwiga. Ekyo'mukisa omubi, yasigaza nviiri mu'ngalo. Yenayena yali amaze okuwerayo mu'maadhi.

Mukunakughala okwamanhi, yekuba mu'kifuba ne'bigala bye'ngalo dha'makonoge nga bwayana, "Adebo, onkozeki kino?" enviiri dh'Adebo dhebamba ku'kifuba kya bbaabbawe. Ekyo ne'kyavaaku abasaadha okumeranga enviiri ku'kifuba.