Nétií apá, nétií olkédî ójî Anansi. Náa éíturuai méídim ateyíera endáa enyé. Néaku kéimiimáa indaikí naáteyierâ ilkúlikáí anyá.

Óre nabô olóng egirá agiroó enkají é enkitejó, néíng'úaya olng'úsíl lé endáa sídáí nayíeríta enkítejó. Néng'elikí ínâ ají. Káké étón éjôn inâ dáa. Néjokí enkítejó, "óre kirreshú endáa meó, máísujá kunâ tokitín." Néjokí Anansi, "kááta esíáai sápuk náyíéú náng'ás aás."

Néíkilíkuan enkítejó ajokí, "ámaâ tenéku endáa, káji áíko tenáípótoki? Nédamisho Anansi, néjokí, "óre amû kááta esíaai náyíéú náídip, káéníki embornóti emotí te enchotó nábo náítóki aenikí enkejú áí te enkái shotó. Óre peê ekú endáâ níkíyíéú níkímpot nímbung ayietú ínâ bornóti. Násiekú." Nédol enkítejó ajó endúátá sídáí inâ. Néas ínâ."

Néítoki atúm iyekényi eyierishó. Néíng'úáya olng'úsíl le oó ímpóóshô eyierá. Néjokí iyékenyí Anansi, "óu mátang'ar endáa amû étáá kéku." Káké etiáka Anansi iyekényi, "óre amû kááta esíaai náyíéú náídip, káéníki embornóti emotí te enchotó nábo náítóki aenikí enkejú áí te enkái shotó. Óre peê ekú endáâ níkíyíéú níkímpot nímbung ayietú ínâ bornóti. Násiekú." Nédol iyékenyí áajo endúátá sídáí inâ. Néas ínâ.

Néíng'úaya Anansi olng'úsíl le oó inkuashên. Néípot olchóre lénye olbitír ajokí, "óu táanyú kunâ kuashên meóto peê kínyâ. Inkó enkurtét íng'oling'olá." Néjokí Anansi, "óre amû kááta esíaai náyíéú náídip, káéníki embornóti emotí te enchotó nábo náítóki aenikí enkejú áí te enkái shotó. Óre peê ekú endáâ níkíyíéú níkímpot nímbung ayietú ínâ bornóti. Násiekú." Nédol olbitír ajó endúáátá sídáí inâ. Néas ínâ.

Óre éjô Anansi ábáíki oreyíet, eenikíno inkejék pokíra ísíet imotíook é endáa. Óre ínâ kátá aké, néning peê eyietarí enkejú nabô. Néyiolóu ajó eó endáâ é enkitejó.

Néítokí aníng enkejú e aré peê eyietarí, néítokí aníng ene uní, ó énê ong'úán, ó énê imíet, ó énê ílê, ó énê naápishana, ó énê ísíet. Néaku imeáta enkejú néméyíétítai. Néyietu aishír páa meáta oltung'áni oning'íto. Néyíetá inkejék, néronkenú.

Káke etudúng'ote imbornót náenikíno inkejék. Nésulakíno Anansi atúa enkáre airopijé emíón oó inkejék. Káke eitú eshukó inkejék áabayu énaa oshî aké. Nébik áâ rónkéní. Némitikí enkúrruna Anansi eitokí aló anyá endáa oó ilchoréta lenyéna.