Eira, ensolo dhaali dhizira magulu.

Dhoonadhoona dhaali dheeghalula bweghalule.

Bantu bonka n'abaali n'amagulu, Wamagulu geyabagha.

Lulala, Wamagulu yasalgho okugha buli nsolo amagulu.

Yali ayenda dhitambule.

Ensolo dhaakoba dhiti, "Kiidha kuba kirungi inho okuba n'amagulu."

Dhaayemba era dhaakina.

Ensolo dhaakoba dhiti okweghalula kuzibu.

Dhaali dhiwulira obulumi.

Ensolo kamala dhaaja ewa Wamagulu.

Entwiga, empologoma, endhovu, obumyu, engoina, n'enhonhi dhaasimba olunhiriri.

Buli nsolo yagheebwa amagulu ana.

Enhonhi dhaagheebwa abiri abiri.

Buli kintu kyacuuka, ensolo bwedhaafuna amagulu.

Edhindhi dhaakina mu kusagamba. Edhindhi dhaagwa ghansi.

Dhaaja okulaga abantu.

Ensolo dhaakoba dhiti, "Tituliiramu kweghalula."

Eyasembayo mu lunhiriri yali Waigongolo. Magulu yabuuza ati, "Eriyo akuli einhuma?"

Waigongolo yairamu ati, "Busa, ninze asembyeyo."

Wamagulu yaakoba mule ati, "Ono n'asembyeyo. Amagulu agasigairegho nnagakozesa ki?"

Wamagulu yaagha Waigongolo amagulu gonagona gaali gasigairegho.

Waigongolo yasangaala inho. Yaakoba ati, "Ndha kutambula mangu okusinga ku abandhi."

Waigongolo nga amaze okugolola, Musota yaidha ewa Wamagulu.

Yakoba Wamagulu ati, "Mpaayo kumagulu."

Wamagulu yaakoba ati, "Amagulu gonagona ngagabye. Obaire gha?"

Musota yairamu ati, "Ndwire okuzuuka."

Magulu yalingalinga abone oba yali esigaire yo ku kumagulu. Tiyabonayo waire mulala.

Wamagulu yaakoba Musota ati, "Bambi amagulu gawoirewo." Musota yeeghalula yairayo eka nga azira magulu.

Okuva kw'olwo, Musota tatenduka inho. Alikulindirira lwali sookayo ku lunhiriri afune amagulu.