Ekyaro kya Sinyaire kikaba kiine emishozi mingi. Enjoka nyingi zikaba nizituura omuri egyo mishozi. Enjoka eyaabaire neekirayo obuhango abataka bakaba nibagyeta Unyalego.

Unyalego ekaba neetiinisa abantu munonga. Ekaba neemirakwo embuzi n'entaama.

Eizooba rimwe abaishiki bashatu barikuzaarwa hamwe, Apiyo, Ajoh na Atieno, bakaza omu kibira kusheenya. Nyinenkuru waabo akabagira ati, "Nyaabura mwegyendesereze orujoka Unyalego! Mutagira ekindi kintu kyona eki mwaiha omu kibira, kureka enku zonka."

Ajoh wenka niwe atarahurikiize nyinenkuru.

Abaishiki abo bakakoma entanda y'amate, ebitookye, ebitakuri n'amaizi. Baatwara n'emigoye y'okubohesa enku, n'omuhoro gw'okuzitemesa.

Ku baaherize kwetebeekanisa batyo, baakwata omuhanda kuza omu kibira.

Ku baabaire bakiri omu muhanda nibagaaniira, ahonaaho mukuru waabo Apiyo yaabagira ati, "Muhuname! Turiyo nituza kuhika ahu Unyalego arikutuura."

Atieno yaayeta bagyenzi be, yaabagira ati, "Nimureebe amaino g'efeeza ga Unyalego! Nimurekye tugatware!"

Apiyo yaabaijusya ati, "Muteebwa eki Mukaaka yaatugambira, ngu tutagira ekintu kyona eki twaiha omu kibira, kureka enku."

Ajoh ati, "Tindikwesiga ebya Mukaaka. Ekyo yaakitugambira ahabwokuba tarikwenda ngu tutungye ebi turikwetenga. Nyowe niinyenda amaino g'efeeza!"

Bataahi be baashoberwa, kwonka 'we Ajoh yaaguma atabafiireho.

Omuri ako kaanya zireeta Unyalego, aija naaronda amaino ge g'efeeza. Ku yaagaronzire gaabura, yaahurira kubi omu mutima, kwonka yaahurira abaishiki nibagaaniira kandi nibasheka.

Unyalego ayeshereka ahansi y'eibaare, haihi n'omuhanda ogu abaishiki baabaire nibaza kurabamu baaba nibagaruka.

Bwanyima abaishiki ku baabaire beekoreire enku zaabo nibataaha, bahurira eiraka ririkuhiisa ngu "Hssssss."

Akaba ari Unyalego, omunwa gwe gwashami nk'omwina, gweteekateekire kuruma n'okumira.

Unyalego ababuuza ati, "N'oha owaatwara amaino gangye g'efeeza?" Tihaine n'omwe owaagizire eki yaagarukamu. Unyalego mpaho acwamu kubagyeza. Abagira ati, "Mwaza kuunyeshongorera! Oraabe ataine rubanja, naaza kubaasa kweshongora gye; ogwo niwe araataahe n'enku ze. Kwonka weena oine orubanja, naaza kweshongora kubi, kandi ninza kumurya."

Apiyo aba niwe yaatandika, haza ayeshongora gye, agumize ngu, "Amaino gaawe tiinye owaagatwara, tiinye owaagatwara! Owaagatwara ari enyima!"

Atieno nawe ayeshongora, kandi ayeshongora gye.

Aha muheru ruba orubu rwa Ajoh kweshongora, haza akaba aine obwoba bwingi munonga. Mpaho atandika, kwonka eiraka ryanga, riba ribi munonga, n'ebigambo bikiikama.

Unyalego amukarira, ati, "Iwe torikubaasa kweshongora nk'abandi?" Atyo amanya ngu Ajoh niwe yaabaire atwaire amaino ge.

Unyalego ahonaaho ayashamya akanwa, arumba Ajoh, amumirakwo. Bakuru be bairuka bagaruka omu kyaro, bagambira buri omwe ekyabaho.

Nyinenkuru w'abaishiki agira ati, "Naamugambira omu kasheeshe. Nangwa hi kuri yampurira!" Ekyo akigamba aine enaku nyingi.