Kolosek Oculi kede Ebu araasi ipaperor lu otau noi kesomaite iboro luipu nepepe. Ekosiete kede aiwo nepepe.

Adope aparan, abu Oculi kotema atiar,"Opapero ageute ber oni akiro nu akorur nepepe tetere oni ibari." "Otiyo ipedori oni akuru inyamat luipu kasodel aisak kede agwelar nejaasi luce," Ebala Ebu. "konye inyobo ikorikini oni?"

Ebala Ebu ebe ajok ti akorikin ekirididi kocamuni do Oculi. Ebala Oculi da elimolini Ebu ebe ejok ti amor asomisine komusiri. "Akasom komusiri ngesi aidar ekirididi elimuni do Oculi." Terere mam ikweny enyamete kolimok do alupok ngun kosodi aira kede aicap da.

Abu do Ebu irurum ebe ijaikitai nges asom naipol nor konye abu Oculi olimote Ebu ebe asom na airenge, kweny apol adepar ate kotiono noimam akasom epatana arauni engo lo adoki ikito anu airenge ikweny awai apaaran kede akuwar ate mam ijo ipedorit aidok ikito ebala Oculi elimokini Ebu.

Abu do Ebu ocamu akiroke Oculi. Abu kocam akoru amusirin bon. Apol aswan noi mam Oculi abu ingarak Ebu. Akaulo na akoru abu Ebu iraik ekirididi musiri bon.

Nekelomunia eduwan abu do Ebu itosom emeleku acapiya. Apol asom noi. Eboyei do Oculi kokuju na atida kowoyi: "Erai opepero ka eseman, kede ecoran isomai bala aturakitaeong ndesi lo apolon ke. Alupok nu ekorei ngesi, irongnan nu ekorei ngesi, icok lu irai ngesi eduwan lo ecapi ngesi, ekirididi lo esaki ngesi.

Ne ecasia ekirididi, awuta do Oculi ke era lo epol noi. Awo ko manikor ebe aireng ikweny aiwai. Aireng ikweny mam da ekesa je enyinyiri.

Odoli do ekirididi asak, ebala Oculi elimokini Ebu ebe ebeit kesi aimo n iraan lu esalanu kiding kec. Ebala Oculi ebe abuni eong aisak iraan lukokyu alupok do ijo Ebu aisak iraan lukokwap nuka alupok. "Ebala do Ebu ebe ajok awomisiot.

Ebala Oculi, "ebe asakuni do eong luka ido yoda asakun lukon." Aso osakuni do Oculi ekirididi kere ko musiri.

Abu Ebu kolot aidweny iboro lu apoloete adepar alupok. Abu kobok owomitor ebe ebuni adumun inyamat lu ejoka. Konye obu odum aliasi bon. Abu kobok nginiboisit mam abu kodum idioboreb kanu adwenyun.

Konye abu konjenu ebe ekokotai ngesi. Abu konyunyurikin. Kobongo ore ibwokit idita lu amamete inyamat. Kedol ebong abu kolot oreke Oculi enyunyura. Abu kolimok Oculi, "Ebe akarioto bobo nepepe opaperoka."

Kolimok Ebu Oculi, "Ebe abuni eong adwenyi ngini bore yeni epoluni kuju naka alipok idoijo audweny ngin bore yen epoluni kotoma alupok nu kokwap." Kocamuni do Oculi abu olimote Ebu ebe abois na aira ekirididi, ajok ti aijulakin irasit. Ocumararos kes airaikin acok.

Ebala Ebu da kotoma apale kana epote kesi kere asom aibok, kede aira, kede aicap iraani. Kocamu Oculi. Apolo do ikesalu okurikin akorok nepepe kowoote da ekec ekosio.

Ne ecasiat acok abu Oculi kolimote Ebu ebe aisak lu elomunite kokuju nuka alupok. Abu Ebu kolot aimo imodoi bore yen elomunit kokuyu nuka alupok konye mam abu odum imodiobore. Abu kodum akwii nuka acok bon. Obongori bobo Ebu ore emamei imodiobore kodita.

Abu Oculi kosqak acok nu epolok. Kipikak toma odula ke. Nekewanyunia Ebu inyamat ke Oculi, abu koyunyurikin. "inyobo ikokwa?" iji eong ingisi do Ebu Oculi. Kotama eutemkem akiro ebe arai Ebu elopet ngesi abu koseu ebe ngesi esaki inyamat lu elomunete kokuju nulupok.

Ebu onyunyurikin noi. Kosodi apenyakin arukitor Oculi tetere epedori ainyang. Konye abu Oculi kopedo akerit atipet ailang Ebu. Agear kaparan kingin, Oculi kede Ebu emamei eipaperone cut.