Batho ka moka be ba tseba gore tlou e na le nko ye telele.
Mehleng ya kgale tlou e be e na le nko ye kopana ya go nona. Bjale ka seeta mo gare ga sefahlego.
Bjale tlowana ya go rata go tseba ya tswalwa. E be e na le dipotšišo go diphoofolo ka moka.
E ile ya botšiša Thutlwa, "Naa goreng o na le molala o mo telele?"
Ya botšiša Tšhukudu. "Naa goreng lenaka la gago le na le nhla ye bogale?"
Ya botšiša Kubu, "Naa goreng o na le mahlo a ma kubedu?"
Ya nyaka go tsibišisa kudu ka Kwena, "Naa Kwena e lalela ka eng?"
"O seke wa tsoga o botsišitše potšišo ya go swana bjalo ka yeo!" gwa realo mmagwe. Ya tloga e nyenyebetše.
Legokobu la mahlajana la re kapela, "Ntšhale morago nokeng. Ke mo o tla bonang gone Kwena e ja eng."
Tlowana ya šala legokubu morago go ya nokeng.
Ya swahla mahlaka, ya ema leribeng la noka. Ya lebelela ka meetsing. Ya re Kwena e kae?
"Dumela," gwa realo leswika leo le lego kgauswi le leriba la noka. "Dumela," gwa realo Tlowana. "Mohlomongwe o ka mpotša gore Kwena e lalela ka eng?"
"Inama ke tla go botša" gwa realo leswika. Gape, gape Tlowana ya inamela fase go fihlelela.
"Photho!" ya ba nkoya tlowana eka ganong ya Kwena. "Ba tla lalela ka wena!" gwa realo Legokobu.
Tlowana ya tseparela fase ka maoto a morago ya goga, ya goga, ya goga. Eupša Kwena ya se lese.
Nko ya Tlowana ya tamologa, ya tamologa, ya tamologa go fihlela "Pooo!" ya wa ka mokokotlo.
Kwena ya gagabela ka meetsing e befetšwe.
Tlowana ya lebelela nko ya yona. E be e sa bone gore e felela kae.
Nko e be e le ye telele e kgona le go fihlelela dienywa mehlareng.
Le go ihlapiša ka mokokotlong.
Le go fihla lehono ditlou di na le dinko tše telele tša go ba le mohola.