Angbianev utar, Udoo, Erdoo man Eryum ve ungwa imo i a wura. Saa ve a pe duen za vinen amar ke wura. Sar ve u za benden Ikyume i sha kwav-Aondo la kpaa. Ngo ve ka er, "ei."

Ve vaa, sha a ciu ngo ve a gema ishima. Kpa gba shami ga. Eryum nongu er una na gba toho una due ken won una da tema imongu a ikyume.

Ngo na yange un. A genger imo sha er agbianyev nav mba kasev kpaa vea ungwa yo.

"Ka hough je ne keren ye, man yo ne soon iyue mkee ga cii. Alu hough a er ne yo, kwagh u bunden ne yan iyue mkee yo ngu ga," Ngo ve or kwagh ne a ahan zwa.

Er ngo ve lu veren ishima er ve kaa er una ta ve kwagh-hir yo, a kaa er, "Ikyume ka ifi u ahir, ngi a tahav mbu been angev. Kpa gema ngi sha kwav-Aondo. Nahan ni fatyo u benden amin ga. A lu or nana gba ikyundu yo, Ikyume i a wase nan ga."

Mbayev mban gba henen sha kwagh ne.

Erdoo kende pine ngo ve er, "Mama, shi ta se kwagh-hir u ikyume la." Udoo kaa er, "Mo, kpaa msoo ape ungwan." "Mo utar ne ooo!" Eryum kende ahor-ave atar sha tese ngo na.

Ngo ve ka e, "Ennnn. De m nenge ase yo? Onov mba doon mo ishima, va ase nen ikyua, Torkwase u kwagh-hir va nya!"

Fefa je, Erdoo yevese za too naha, van na ngo na. Naha ne, lu sha ikyav u tough ku tor. Akende tough kula na ngo na. Eryum shi za va a adikpo nan ngo na, kange sha tyo.

Tso ve tema viing u ungwan kwagh-hir u ve ungwan keke yo. Udoo di tungwa hondo, ikyav i ngo na ahii kwagh-hir u tan.

"Ngise, ikyume lu ifi u ahir. I yer ken ako a lun gese-gese sha Mbadede la. Man er ifi ne lu a tahav mbu been angev yo, i kulan un.

A shiu ior yo, u ma un a ma. Kwagh u nan iwasen ne lu kwagh udoon Ikyume ne kpishi. Kpa Ikyume gema soon ior mba lun anza dang ga cii."

"Sha a ciu ahir a ifi ne yo, gema ngee a kwagh yan u ndohor u buter ve yer e 'ice-cream' la. Anti or u nana va mgerem ma kesen hen ifi la je, nan zua a min u yan, hemban cii yo, anmbayev.

Mluashe u 'ice-cream' ne lu; nyian-bong, nyian-gbang, agbedang, gese-gese, kwer-kwer,dishi-dishi man mar."

"Yange tso, Mbom, ango kwase u zan iyol za mough yande la va. Ve yo, kohol or u kuran. Er or shon fa un ga yo, akperan gba un kpishi. Kpa or shon ver ishima ga.

Or kuran la gema tese Mbom gbenda u zan hen ifi u ikyume la. Kaa a na er, a kor iyol tsaha. Mbom kpa lumun."

"Er Mbom kese mngerem ma ifi u ikyume la ma je, wanger wen iyol wang. Mbom gema yenge keen man keen, a nenge a or ga tso.

A too iwen ta ken mnger ting. A nenge er ifi la kpa mough deghmee, hide samber. Kwagh shon doo Mbom kpishi. Shi atoo ankonov vishir shin min. Shi mkpanger la kimbir."

"Mbom man tsuwe gba a gba shin ifi jimin cii! Mhen na yo, lu u man un a tsor gbem shawon. Tso ifi shi mough er ka ivaan nahan yem sha abeen, kera hide hen Mbadede ga cii. Ashie a gen yo, ifi ne ngu a dondo sha abben a wura, sha a ciu una umbur ayange un lu ifi la.

Ka mkur u kwagh-hir wam je ne." Mama mase kulen."

"Shi apine er, Mbayev mba doon mo ishima, I er nan man ne soo kwagh-hir ne kpishi nahana?" Udoo na un ikyar a ahan zwa er, "Ka sha er me umbur u veren ishima sha a mo shi u wem ikyo yo."

Erdoo di ka er, "Mo yo, msoo u umbur mluashe u ikyume kpaa."

"Eryum di lu keren mtsera na yo, ka er. "Mo yo, ka sha a ciu kwaghyan u 'ice-cream' la! U nam wen hegen-hegen neee?"

Ngo ve o er, "Ennnn. dohor hegen kpishi, kper tso se ya nen ice-cream. Shi kper gen yo, me ta ne kwagh-hir u mkur u ikyume la."