Document

Kuúrá wùn Kibóŋaàrí kí

Alice Mulwa

Salim Kasamba

Yì-iì dzə̀ fó yà ngùʼ, e ntèʼ yee Mekosi, Kuúrá wùmòʼ wáa dzə fo a wù koŋ bvə̀mkúʼ.

E ntèʼ yìmòʼ fó ghaŋ, Kibóŋaàrí ki wáa dzə fo a kí fan fan. Kuúrá wùn Kibóŋaàrí kí-iì dzə̀ ŋkar si.

Kuúrá nèn yù ji yúu símóʼ sí dzə̀ á e ndzə̀n ndzə̀v, a sí fer a vilu ve juujùŋ vi. Ndzə́v rə́ne dzə̀ kimà ké ndzəv, é mbìv ntoŋrì. Yi-ií lóo dzə e bǎm kiya yúu sin si dù ghán kwaʼda, e dzə̀ʼə̀m ŋgàm fur bóo kfən e bàm. Kuúrá nèn yòŋ e ŋaàrí jii, "Wòsò kér fo dù e kav vilu mo yúusí duùn ghán bèn."

Kiboŋaàrí kí-iì fan fó dù. Yii bèy, woómé si nèn ghàʼ fo wù sháʼnín. Wáa dzə kijàvndzə, nyám see sibaà sin si nèn fəə̀ a dù fo ŋwáʼ se yúu sí dzəə̀n. Kuúrá nèn a ghan cér cér, yii bèy mo Kibóŋaàrí ki-iì fanè, ki nèn kù a səŋ wún, a wìy fo bàm ji weè weè.

Áwune kóʼ gwan, e sə̀y kiwoóy e tòsín e mboʼ si. Áwune dù e tùm kimà ké ndzəv kiy, ke kí dzəə̀n é mbìv ntòŋrì e dù fo mbìy.

Áwune nèn yèn ŋwaʼ se yuu siy lèn e vici é gwan. Kuúrá lé vitaáví vitaáví e dù fo vici viy vi dzəə̀n. Sí-iì lò ne a kaarí Kibóŋaàrí mo wù-uù ghanen ne e dòr, a jìŋ kfə̀n yár wun.

Kuúrá dù e mee fo ŋwaʼ wo kuukùʼùné dzəə̀n e nèn a gìr vinyo girsin. Wù nèn jàŋ Kibóŋaàrí e yòŋ jii, "Kóʼ é kici cér cér, e dòm ŋwaʼ vəne fó nsay."

Kibóŋaàrí ki nèn a kàtìr, a koʼ e kici ji weè weè. Wù-uù ki jii, a wun lèrìr bo wun sí túm á tumén. Kiloŋ kí nèn a shwiíy Kuúrá, wù kéʼ a taŋnén Kibóŋaàrí.

Kibóŋaàrí kí kúm ŋwaʼ və̀y e nèn yù mo yúu sí ko. Yúu sí-iì dzə̀ə́ aáwune ŋwaʼ si. Kibóŋaàrí kí nèn yàʼ e gbù fo kici. Ŋwaʼ wo kuʼùn vəyi gbú sá.

Wú lóo gbù bèy e nèn neèm e Kibóŋaàrí kí kitu. Vilu vi nèn sùm kibóŋaàrí, la wù yòʼ a yensín. Kuúrá nèn kèʼ a la vilu vìy. Kilòŋ ki shwiíy yúu sí.

Sí wáa terí Kuúrá terín wún e dzə̀m. Kuúrá nèn tùmnén a leʼ fo kpúu li wun. Yii bèy, yúu sí shóʼ é bàm wó.

Kuúrá léʼ e sə̀y fó gwan, e lìysín ndzə́v, e tòsín mboʼ si, e sə̀ʼə̀y e kiwoóy. Yúu sí kù-uù bom bòmèn e Kuúrá wùn kù téri wun térín mo wù léʼ bèy.

Kibóŋaàrí ke kí-iì dzəə̀n é sar ŋwaʼ ki nèn yù a virə́ʼ vidzə̀m vi sə́sín ji nyoòŋ. Wù yú a vilu wùn à ŋwaʼa yúm ne e tàvtí e wun ndzə̀m.

Wù nèn yèn ji yòʼ dzə̀ wun kfə̀n a ŋàŋrì a nəə́ a kighin ji wun laayi. Wún və́ wo fíyi wo tavíné, wo dzəə̀n vilúu nèn a teʼtín wun.

Kuúrá-aà lò ji wun sí mee a e wùn laʼ e nèn gbù bìʼ dór yeé ŋàŋ wùn à nsəə̀ se sí-iì dzəə̀n wún və́ e dzə̀m si. Wù lòo yìmèn, e nèn yèn a yúu sí té wun bèy, e yii vibá ví wáa dzə e wun wùy.

Á mo kí-iì ghanen é bo kibóŋaàri kí wáa ker wún wo wú táví, é kuúrá wáa ker wún wo wú kér vibá. Kuúrá nèn shìvtì ji wun yòʼ dzəə́ wìy mùm a vishóŋ. Á bèy, viŋkar ve kuúrá wun kibóŋaàri vi nèn mày.

You are free to download, copy, translate or adapt this story and use the illustrations as long as you attribute in the following way:

Kuúrá wùn Kibóŋaàrí kí

Author - Alice Mulwa
Translation - Beatrice Tafon Takeh, Mbinkar Emmanuel Keelen
Illustration - Salim Kasamba
Language - Lámnsoʼ
Level - First paragraphs