Yì-iì dzə̀ fó yà ngùʼ, e ntèʼ yee Mekosi, Kuúrá wùmòʼ wáa dzə fo a wù koŋ bvə̀mkúʼ.
E ntèʼ yìmòʼ fó ghaŋ, Kibóŋaàrí ki wáa dzə fo a kí fan fan. Kuúrá wùn Kibóŋaàrí kí-iì dzə̀ ŋkar si.
Kuúrá nèn yù ji yúu símóʼ sí dzə̀ á e ndzə̀n ndzə̀v, a sí fer a vilu ve juujùŋ vi. Ndzə́v rə́ne dzə̀ kimà ké ndzəv, é mbìv ntoŋrì. Yi-ií lóo dzə e bǎm kiya yúu sin si dù ghán kwaʼda, e dzə̀ʼə̀m ŋgàm fur bóo kfən e bàm. Kuúrá nèn yòŋ e ŋaàrí jii, "Wòsò kér fo dù e kav vilu mo yúusí duùn ghán bèn."
Kiboŋaàrí kí-iì fan fó dù. Yii bèy, woómé si nèn ghàʼ fo wù sháʼnín. Wáa dzə kijàvndzə, nyám see sibaà sin si nèn fəə̀ a dù fo ŋwáʼ se yúu sí dzəə̀n. Kuúrá nèn a ghan cér cér, yii bèy mo Kibóŋaàrí ki-iì fanè, ki nèn kù a səŋ wún, a wìy fo bàm ji weè weè.
Áwune kóʼ gwan, e sə̀y kiwoóy e tòsín e mboʼ si. Áwune dù e tùm kimà ké ndzəv kiy, ke kí dzəə̀n é mbìv ntòŋrì e dù fo mbìy.
Áwune nèn yèn ŋwaʼ se yuu siy lèn e vici é gwan. Kuúrá lé vitaáví vitaáví e dù fo vici viy vi dzəə̀n. Sí-iì lò ne a kaarí Kibóŋaàrí mo wù-uù ghanen ne e dòr, a jìŋ kfə̀n yár wun.
Kuúrá dù e mee fo ŋwaʼ wo kuukùʼùné dzəə̀n e nèn a gìr vinyo girsin. Wù nèn jàŋ Kibóŋaàrí e yòŋ jii, "Kóʼ é kici cér cér, e dòm ŋwaʼ vəne fó nsay."
Kibóŋaàrí ki nèn a kàtìr, a koʼ e kici ji weè weè. Wù-uù ki jii, a wun lèrìr bo wun sí túm á tumén. Kiloŋ kí nèn a shwiíy Kuúrá, wù kéʼ a taŋnén Kibóŋaàrí.
Kibóŋaàrí kí kúm ŋwaʼ və̀y e nèn yù mo yúu sí ko. Yúu sí-iì dzə̀ə́ aáwune ŋwaʼ si. Kibóŋaàrí kí nèn yàʼ e gbù fo kici. Ŋwaʼ wo kuʼùn vəyi gbú sá.
Wú lóo gbù bèy e nèn neèm e Kibóŋaàrí kí kitu. Vilu vi nèn sùm kibóŋaàrí, la wù yòʼ a yensín. Kuúrá nèn kèʼ a la vilu vìy. Kilòŋ ki shwiíy yúu sí.
Sí wáa terí Kuúrá terín wún e dzə̀m. Kuúrá nèn tùmnén a leʼ fo kpúu li wun. Yii bèy, yúu sí shóʼ é bàm wó.
Kuúrá léʼ e sə̀y fó gwan, e lìysín ndzə́v, e tòsín mboʼ si, e sə̀ʼə̀y e kiwoóy. Yúu sí kù-uù bom bòmèn e Kuúrá wùn kù téri wun térín mo wù léʼ bèy.
Kibóŋaàrí ke kí-iì dzəə̀n é sar ŋwaʼ ki nèn yù a virə́ʼ vidzə̀m vi sə́sín ji nyoòŋ. Wù yú a vilu wùn à ŋwaʼa yúm ne e tàvtí e wun ndzə̀m.
Wù nèn yèn ji yòʼ dzə̀ wun kfə̀n a ŋàŋrì a nəə́ a kighin ji wun laayi. Wún və́ wo fíyi wo tavíné, wo dzəə̀n vilúu nèn a teʼtín wun.
Kuúrá-aà lò ji wun sí mee a e wùn laʼ e nèn gbù bìʼ dór yeé ŋàŋ wùn à nsəə̀ se sí-iì dzəə̀n wún və́ e dzə̀m si. Wù lòo yìmèn, e nèn yèn a yúu sí té wun bèy, e yii vibá ví wáa dzə e wun wùy.
Á mo kí-iì ghanen é bo kibóŋaàri kí wáa ker wún wo wú táví, é kuúrá wáa ker wún wo wú kér vibá. Kuúrá nèn shìvtì ji wun yòʼ dzəə́ wìy mùm a vishóŋ. Á bèy, viŋkar ve kuúrá wun kibóŋaàri vi nèn mày.