Document

Mótù wo faŋèn wo wù kiʼ blùu

Mecelin Kakoro

Mango Tree

Wìr-iì yii du aà Ebey nteʼ, wù kù yèn mótù fo e mòʼón. Mótù və̀n-eè fàŋ, a wù kfə̀n kiʼ blùu. Wù-uù lo wù wàa yii njèʼèr feyì.

Yìy a Ebey wìy lò, e sùúy e Ebey é kishiiy kímóʼkí jii, "Wòsò bvəə́shi, e dù e mvə̀m laʼ e yun yúnifòm wò."

Wúné bóŋ Ebey feyì, biʼ fo áwune-eè yii bvəə́shi a ghan a dzə̀ é mótù wo faŋèn və̀y. Wù yòʼ-oò lo e yù fo buuné vitsə́ʼ vee shooy.

Yè wov-iì wiy ji wun yim a wun fo mbuùné, a wù ki yìmèn ne e maʼ a dzə ndzəy.

Ebey wùn yè wov nèn a ghan a dù e mèé fo á yii shiy mótù. Áwune nèn ku a shiy mótù wo faŋèn, wo wù kiʼ bluu və̀y. Yiibey la mótù və̀y yoʼ wiy gheéy.

Wír ámóʼó-oò wìy sá e kirə̀ʼ fen fo á yii shiy mótù. Á shìy mótù ntéŋ ntéŋ, e nèn lo a ndzəkír, ndzə́kir bèy dzə́ti jii, "Mótù bèé len?"

Vifií vi nèn lò a lày Ebey, wù wáa kwàʼtì jii, "A tàm bo vèr yòʼ yii yu fo dù e mvə̀m laʼ. M yòʼ dzəə́ yìi keerí yunifom wom."

Wír ámóʼó shíy e dòr, e nèn a kfə̀n fó laʼ. Ebey bùr tóŋ, Wù yò'-oò kong e kfen fo laʼ. Yè wov yoŋ jii "Wòsò shiy e bǎm shintàm."

Áwune lo e sàsìn e yù kifá a kí dzəmè, e nèn yèn kibvər a kí kóʼ e yuv. A yì-iì dzə̀ mótù mo wù wiyì.

Yii bèy, a wù yòʼ kiʼ blùu. Wù-uù bàŋ bàŋèn a wù kfə̀n dzə̀ e térí. Wírí yoʼ-oò lo a koŋ fo nəə́ e woo shoon woo mótù.

Nsə̀ŋ nèn a wamnen jii, "Vèn á nəə́, vèn á nəə́!" Wù kfə́n a yoŋ jii, "Vèsən ndzə̀y lán feyì."

Ebey wùn yè wov dzə̀ wír mbiyi ve vé-eè nəən e mótù. E bǎm shishàr wíri nèn nə̀ə́ e mótù wo wù baŋ bàŋèn və̀n, a wù kfə̀n dzə é téri.

Ebey lo e nàn sí fo shùu wúndù wo mótù, e yèn wíri aá dzəə́ bér fo ndzə anín.

Aámóʼó dzəə́ leʼ wiyi ji sà dzə̀ á kòóy fóo barsín a. Á wáa wiy bèy a kirə́ kí yoʼ dzə̀ə́, bìʼ fo mótù wo baar-eè run ne.

Yìy à Ebey nèn a ghay jii, "Mótù wo faŋèn wo wù kiʼ blùu sà fen bèé lèn a?" Nsə̀ŋ bìnèr jii, "Wù-uù sìíy e bìr. Á mum ji á wáa náŋsín."

Ebey yó-oò dzəə lò a ci nshòm mótù. A wù yòʼ cí ji wù sà fàŋ, mo wù dòr a? Kidzə̀m ki-iì dzə̀ ji mótù və̀n dú a e mvəm laʼ.

You are free to download, copy, translate or adapt this story and use the illustrations as long as you attribute in the following way:

Mótù wo faŋèn wo wù kiʼ blùu

Author - Mecelin Kakoro
Translation - Beatrice Tafon Takeh, Mbinkar Emmanuel Keelen
Illustration - Mango Tree
Language - Lámnsoʼ
Level - First sentences